Toprak

TOPRAK

Taryhyň şaýady, geljegiň bagty,
Şeýle sen häzirem, ozalam toprak,
Mähirden ýaprakly söýgi daragty,
Daglary asmana gezelen toprak.

Destiňden naz-nygmat daýym düşmedi,
Üstüňde batyrlaň aty kişňedi,
Kastyňda duşmanlar gezdi, paşmady,
Gerşi toýnak bilen gazalan toprak.

Gün görküňe maýyl boldy yrakda,
Şemal turdy baglaň başyn yranlar,
Gyşyna kümüş gar ýagdy syranlar,
Baharda güllerden bezelen toprak.

Meňzeýärsiň ak çörekli tamdyra,
Waspyň diýsem, ele alyp tamdyra,
Ýüregimi ýüregiňe daňdylar,
Indi ogluň ömri uzalar toprak.

■ WATAN

Gülleriňi öpdüm dyzymy epip,
Gitdim ýaýlalarňa awara, Watan.
Saňa azda-kände degmese nepim,
Ömrüme ýüregiň awar-a, Watan.

Saýyl düzleriňe, belentleriňe,
Kaýyl gowularňa, erbetleriňe,
Maýyl seni goran perzentleriňe,
Gursagyny boýap al gana Watan.

Biz şolaryň nesilleri, dowamy,
Ýaşaýşa – nur çaýýas, geljege – many.
Päkize asmanly, sergin howaly,
Baý sen gözellige, çarbaga Watan.

Togabym bar her ädim, her dabanňa,
Sogabym bar seň goýnuňda galarma,
Jogabym bar ýowuz duşman abansa –
Gelmezine dagy-duwara Watan.

Gurbandurdy ORAZOW.