GÖRESIM GELÝÄR
Men seni şeýle bir göresim gelýär,
Şatlanamda,
gamlanamda,
aglamda,
Surat kimin göze dikip keşbiňi,
Saňa gyzyl gülden çemen baglamda.
Men seni şeýle bir göresim gelýär,
Hyýalymda,
Düýşlerimde,
Huşumda,
Bardyr däli derýa deýin söýýänler,
Görsem şeýle bagty deňi-duşumda.
Men seni şeýle bir göresim gelýär,
Unudyp dünýäni, gidip serimden,
Düýşlerimde görsem näzik jemalyň,
Oýarmaň,
Oýarmaň ýatan ýerimden.
Men seni şeýle bir göresim gelýär,
Boş arzuwlar umydyny dargadyp,
Nesip edermikän ýene görmegi,
Şu hyýallar barýar meni garradyp.
Gurbanmämmet MEREDOW.
