Hijri-zulmydan niçe kim, eýlesem men dat oňa...

Hijri-zulmydan niçe kim, eýlesem men dat oňa,
Diňlemes sözümi, kylsam her niçe perýat oňa.

Gözleri ýüz men kibi aşyklaryň ganyn döker,
Ogşamaz hiç bir garakçy, kapyry-jellat oňa.

Kamatyňa serwi guldur, ýüzüňe güller geda,
Kamatyň gaşynda ýok, wajyp diýmek azat oňa.

Her niçe saýt eýleýin diýp, men ony kyldym şikar,
Ol meni saýt eýledi, men bolmadym saýýat oňa.

Haýsy aşyk kim seniň yşkyňda Mejnun dek imes,
Bermänmiş yşk ylmynyň tälimini ustat oňa.

Ah kyldykça ýanar janymda yşkyň ataşy,
Kim ýatar her dem bu ahym nafhasydan bat oňa.

Gaýyby biçäräge «gulum» diýseň, eý, şasuwar,
Fathi-nusratdyr, ýakyn bil, bu mübärek at oňa.