Hoş görer menden rakyby, rehm edip janan oňa...

Hoş görer menden rakyby, rehm edip janan oňa,
Nije gatlansyn ýürek, nije düwünsün jan oňa.

Aşygyň hakynda çoh söz söýlär ynanma rakyp,
Adat olmuşdyr jahanda, ki dostum, böhtan oňa.

Dil merezine lebiňden eýlemeseň bir alaç,
Hikmet-le çäre bolmaz, olsa beýik Lukman oňa.

Atsa gamzaň tirini jan potasyna gaşlaryň,
Görkezer dil dagy, jana, jöwheri peýkan oňa.

Akl-u, küll-u daneş-u ylm-u ulul elbaby bap,
Görmese husnuň kitabyndan diýruz nadan oňa.

Her säher bady-saba bagy-jahanda dilberiň,
Zülpüne bardykça şana müşk eder efşan oňa.

Safhaýy-husnunda başlamyş wepa resmin ýazar
Lajywert ile ýedi gudrat hatty reýhan oňa.

Yşk meýdanynda top olsa güneş, olmaz ajap,
Kim kamar her dem helalyndan sunar çowgan oňa.

Dil dilärmiş aýdy waslyň çün keman ebrularyň,
Çohdan etdim, dostum, men janymy gurban oňa.

Hatyň enşasyn haddyň üstünde kim ýazdy ajap,
Kim Keraman Kätibin olmuş durar haýran oňa.

Ýollar üzre Mähriniň her dem görer häk oldugyn,
Bir nazar kylmaz, nedir jürmi, ajap soltan oňa.