Ýene bir wakanyň beýany
Aşgabadyň töweregindäki obalaryň birinde bir agzybir maşgala ýaşaýardy. Maşgala başlary bolan är-aýal daýhançylyk bilen meşgullanyp, çagalarynam (dört ogul bilen iki gyz) kiçiliklerinden zähmet bilen terbiýeläp ýören adamlardy. Körpeleri on iki ýaşa gidende olar öýlerine ýedi ýaşlyja ýüz-gözüni, üst-başyny kir-kimir basan gyzjagazy getirip, çagalaryna: "Şu günden şeýläk bu siziň jigiňiz bolar, oňa bir-biriňize seredişiňiz ýaly seretmelisiňiz" diýip tabşyrýarlar.
Hiç kimden ses çykanok. Olar sessiz razylaşýarlar. Iki gyzlary gyzjagazy äkidip suwa düşürýärler, oňa howul-hara-da bolsa, öz köýneklerinden köýnejik dikip berýärler.
Ol wakadan on ýyl geçýär. Maşgala başlarynyň ikisem heläkçilige uçrap, bir günde aradan çykýar.
Şol obanyň mollalarynyň bir häsiýeti bar: toýuna saz getireniň, ölüsini aglap ugradýanlaryň soň toýuna-ýasyna baranoklar.
Her gezegem tabyt öýden çykarylmaka uly goh edip, aglamazlygy tabşyrýarlar.
Bu gezegem şeýle bolýar. Hiç kim aglamaga het edip bilenok.
Gölegçiler gaýdyp gelensoňam, hiç kimden ses çykman, esasy molla aýat okamaga başlandan (mollalar ol obada ýanjanly bermegem gadagan edipdiler), başlaýar bir agy!
"Waý, ejeme-eý! Wah, kakam-eý! Waý, käbäm-eý, wah, kyblam! "
Ol agyň sesi ýene-de on molla goşulşyp okasa-da, barynyň sesini basyp ýatyrjakdy!
"Gelmäň golaýma! Tutmaň adymy! Aglajak, janyňyz çykýan bolsa-da, aglajak! Siz aglamaň! Ejeňiz ölende-de, kakaňyz ölende-de, çagaňyz ölende-de aglamaň! Men ölemde-de gelmäň! Jaýlamaňam! Tersiňize geliň toýuma-da! Häzirem güm boluň!"
Molladan dem-düýt çykanok, agy bolsa domam edýär:
"Howwa, men öz agymy aglaýan! Indi men kime gerek?! Yedi ýaşymdakam öz araralarynda sögüşen bolup, meni köçä taşlan ho-ol oturan meni dogran bilen daşardaky dogurdana gerekmi indi men?! Allajanam meni aglatmajak bolsa, näme üçin maňa bu ykbaly berýär?! Näme üçin meni köçeden ýygnan ezizlerimi alyp gidýär?!
Waý, iller-e-ý, men aglaman, kim aglasyn?!"
Onuň sesine ilki iki uýasy, soň gelnejelri, soňam ejeleridir kakalarynyň aýal doganlaram goşulýarlar.
Mollalar okamaly zatlarynam okaman, turmak bilen bolýarlar. Daşardaky erkeklerden diňe aglasy gelýänler galýar. Okalmaly hemme zatlaram okalýar, tizara mal kesilip, galan adamlara tagam hödürem edilýär.
P.S.
Şol wakadan soň ýaş oglanlar toýlaryna bagşy getirip başladylar, mollalara bolsa: "Jynazamyza-da gelmejek bolsaňyz, goňşy obalardan molla çagyraýarys" diýdiler.
Üc ýyldan soň bolsa doganlary şol gyzyň durmuş toýuny şeýle bir üýtgeşik tutdular welin, özüne molla diýen şol günlük obadan gaçyp gidendir diýdiler.
Heniz-henizlerem duş gelýän, köpçülikde başgalaryň agysydyr-gülküsine kontrollyk etjek bolýanlara. Sesiňi çykarmasaň, olar köpelibem barýarlar.
