Rehmet Seýidow

REHMET SEÝIDOW (1910-1955)

Şahyr Rehmet Seýidow 1910-njy ýylda Halaç etrabynyň Akdepe obasynda dogulýar. Atamyrat şäherindäki mugallymçylyk tehnikumynda, soňra Aşgabadyň mugallymçylyk institutynyň dil we edebiýat fakultetini tamamlaýar.
Şahyryň ilkinji goşgular ýygyndysy 1938-nji ýylda neşir edilýär. Onuň ''Lebap gyzy'' poemasy 1941-nji ýylda çap edilýär.
Rehmet Seýidow ''Ýaşlara ýadygär'', ''Amanyň bagy'', ''Awçy, atma jereni'' ýaly ýygyndylary çagalara niýetlenendir.
Şahyryň ''Eserler'' atly uly göwrümli kitaby ol aradan çykandan soň, 1956-njy ýylda neşir edilýär. Kitaba ýazyjy Beki Seýtäkow sözbaşy ýazypdyr.
Görnükli şahyra doglan gününiň 85 ýyllygy mynasybetli Garaşsyzlyk ýyllarynda 1995-nji ýylda ''Türkmenistanyň halk ýazyjysy'' diýen hormatly at dakyldy.

UKLANYŇDA

Näzik gabaklaryň hut iňrik ýaly,
Göýä güneş deýin gözüň ýaşypdyr.
Kirpikleriň aşyk bolan mysaly,
Bir-birini tapyp gujaklaşypdyr.
Howlugyp dem alşyň, näzijek gülşüň
Meni düýşde görnüşini aňladýar.
Gözel ak düşekde sen towlanyşyň
Agşam görseň hyýalymda daň atýar.
Misli alma gonan çyg säherlerde
Ýaňagyňda bulduraşýan kümüş der.
Bizden başga hiç adam ýok bu ýerde,
Oýan-da, söýgülim, maňa posa ber!

ÝAPJAGAZ

Ýapjagaz, sen ýadamazdan akýarsyň,
Akyp paýtagtymy suwa ýakýarsyň.
Tiz akýarsyň, tigirmidir sen astyň!
Howlugýarsyň ýa-da garaşýan dostuň?
Irkilmeýän, dynmaýaň, heň edýärsiň,
Bag-bossana suw bermäge gidýärsiň

BAGT IÇINDE

Janym, tenim,
Göz röwşenim
Watanym hem halkymdyr!
Her bir zaman
Güýç aýaman,
Oňa aýdym düzerin.
Gün nura baý,
Gijeler Aý
Durmuş doly ýalkymdyr.
Günde-günde
Bagt içinde
Men gulaçlap ýüzerin.

AWÇY ATMA JERENI

Awçy atma jereni!
Onda uly arzuw bar.
Intizar ol, gör ony,
Ol kanala garaşýar.

Gör injigi inçejik,
Suw diýip köp ýörmekden.
Mahrum etjek sen niçik,
Ony kanal görmekden?

Sanalgyja gün galdy
Arzuwyna ýeterne,
Kanal çöle ýol saldy,
Gelýär jerenleň ýerne.

Kanal gumy boýun edip,
Geçsin, çöli suwarsyn!
Oelaklaryn oýnadyp,
Jeren-de suwa barsyn.

Awçy, atma jereni!
Onda gowy arzuw bar.
Gowy arzuwy seni
Etsin oňa rehimdar!

"GARAGUM" žurnaly, 2009 ý.