Rubagylar

RUBAGYLAR

Gel, göwün açaly, gussany taşla,
Pikir etseñ müñ hyýal bar bu başda.
Unudaly dünýäñ derdi-azaryn,
Allam, bu gün azar berme, bagyşla.

* * *

Iner ýükün bir gaýratly är götär,
Älem ýükün ýalñyz Biribar götär,
Bu zeminiñ sansyz jebir-jepasyn,
Berekella, bu togalak şar götär.

* * *

Omar, seniñ bolsadyñy ekdim men,
Gögermedi, gury azap çekdim men.
Älem çuñlugyny boýlajak bolup,
Gark bolmankam, zordan gaçyp çykdym men.

* * *

Muña çylşyrymly durmuş diýýärler,
Ony biler akly çatyp duýýanlar,
Gury çörege-de bal ýaly diýer -
Derin döküp zähmet çekip iýýänler.

* * *

Şatlansam joşýaryn, däli deñiz dek,
Saña garrama ýok, eý, juwan ýürek.
Bäş günlük ömrüñi şatlan, hoş geçir,
Bir wagt bizdenem tapylmaz derek.

* * *

Başarsañ ynsanyñ göwnüni ýykma,
Ýa ony kemsidip, ajyñy pürkme,
Ýagşy sözüñ bilen güler ýüzli bol,
Adam bolmaklygy ýadyñda sakla.

* * *

Nijede ýagşy söz, güler ýüz gytdyr,
Agyr günäñ biri ýalan töhmetdir,
Bu zeminde ynsanlaryñ içinde,
Kimsi "şagal", "tilki", kimsi "gurt", "itdir".

* * *

Gargalar, gargalar, gara gargalar,
Sizlerde ne owaz, ne mukam bolar,
Bilbiliñ deregne saýran bolup siz,
Salmañ ýüreklere ýara, gargalar.

* * *

Kä mahal ýüz tutdum beýik Pyraga,
Ol diýdi: -Gyssansañ dag bar, daga,
Daglardyr mertleriñ hemaýatkäri,
Aglasañ duşmana duýdurman agla.

* * *

Süýrenijilerñ biri bolan suwulgan,
Haýdap barýan wagty duşupdyr ýylan.
Sorapdyr ol: - Aýt, ýeriñ ýüzünde,
Heý, gördüñmi biziñ ýaly süýrenýän?..

* * *

Akar suwda gördüm, bar iki kenar,
Sag kenar çemenlik, gülli, lälezar.
Bu ne beýle geñ-tañ, haýran galdym men,
Suwuñ çep kenary ot-çöpe-de zar.

* * *

Ejiziñ ganymy köp bolar eken,
Eşidýäni awy gep bolar eken,
Öz başyñy özüñ çarap bilmeseñ,
"Sen otur, sesiñi gap!" bolar eken.

* * *

Alym bolmak añsat, adam bolmak kyn,
Her kimden tapylar agtarylsa müýn.
Şyltak atyp, teýeneli sözleýän,
Ol kişiler özün bilmez büs-bütin.

* * *

Güýç-gudratyñ gördüm sende tebigat,
Büdüredi ozup gelýän ýüwrük at.
Göz boldumy, dil boldumy, bilmedim,
Käte at dek büdüreýär adamzat.

* * *

Aý-Gün aýdar, bulut aýdar, ýel aýdar,
Owal haram bilen halaly saýgar.
Haram gazanç bilen ýygnalan baýlyk,
Uzak gitmez basym yzyna gaýdar.

* * *

Beýik bolmak daga etdi miýesser,
Depelerem "menem dag bolsam" diýer,
Dagdyr beýikligiñ, merdiñ nyşany,
Görip beýik görse örtener, köýer.

* * *

Derejäñ artdyrar bir ýagşy gylyk,
Özüñe zyýandyr bilseñ ýaltalyk.
Adam işlemese, bir kär etmese,
Ondan kän ýagşydyr dikilen gazyk.

* * *

Sen bolmasañ, kalbym ynjap döwülýär,
Günüñ yssy howry ýakyp-gowurýar,
Pelek şatlygymy alýar elimden,
Pany sensiz boş, biderek, söwer ýar.

* * *

Durmuş girdabyna düşdüm ýaşlykdan,
Ejir çekdim gara gyşdan, açlykdan,
Ýöne gara günleñ baryna derek,
Ýowuz zat ýok eken, dost, mätäçlikden.

* * *

Dogduk mekan ýaly bahar görmedim,
Öz obamyñky dek säher görmedim,
Bu zeminde gök asmanyñ astynda,
Ene mähri kimin mähir görmedim.

* * *

Şygyr, buýsanjym sen, ykbal ýoldaşym,
Senden ylham-kuwwat tapdy bu başymn
Begensem, ynjasam, ýa ýalñyz galsam,
Sensiñ goldan hemaýatçy, syrdaşym.

* * *

Adam bar şadyýan, güldürip bilýän,
Adam bar aglany diñdirip bilýän.
Görmäge adamdyr, deñ däldir bary,
Adam bar hassany galdyryp bilýän.

* * *

Ýar meniñ kalbyma bir ýagty çyra,
Sönýär çyram eger gitseñ daş ýere,
Sen meniñ Aý, Günüm, gökde ýyldyzym,
Melhem sen ezizim, bil ýüregime.

* * *

Iýip-içsem, çaý-nahary goluñdan,
Tutup sypalasam ak goşaryñdan,
Bil, bu jahan meniñ üçin jennetdir,
Ýokdur başga jennet ýar gujagyndan.

* * *

Alsañ nesihatym, öwüt-pendimi,
Oka şygrym, setirlerim, bendimi,
Goluñdam gelmese, ajy doýurmak,
Hemaýat ber, sora näsag derdini.

* * *

Iner ogul är işini bitirer,
Ýagşyñ göreldesin alyp göterer,
Bihepbe oguldan sokydaş ýagşy,
Bikemal ogul-gyz yzyñ ýitirer.

* * *

Aýdar Baýramgurban, başyña gurban,
Ýaryñ her bir sözi derdime derman,
Bu zemine ýagty saçýan Aýym sen,
Ýaşap bilmen seniñ gül ýüzüñ görmän.

Baýramgurban BEGNYÝAZOW.