Barýaryn

■ BARÝARYN

Giñ älemden jaý tapmadym özüme,
Derdim duýan syrdaş gözläp barýaryn.
Çolanyp umytdan ören donuma,
Gussamy gözlemde gizläp barýaryn.

Hyýalymda geçen ýoluma bakyp,
Joşgunly günleriñ goýnunda akyp,
Kä şatlanyp, käte pikire batyp,
Hasratyny özgä dözmän barýaryn.

Ýaşadym gussasyz güne garaşyp,
Günleñ, aýlañ gatlarynda azaşyp,
Şöhlesi hem görşi biraz azalan
Gözlerimden hiç nem syzman barýaryn.

Bagtly bolmak üçin bolar synanyp,
Geçen güni dolap bolmaz gynanyp,
Wysal boljak arzuwlarma ynanyp,
Umytlarmyñ taryn üzmän barýaryn.

■ ÄHLI ZADY OÝUN SAÝSAÑ

Ähli zady oýun saýsañ,
Çynyñ boýny burulmazmy?
Hemme söze gülki çaýsañ,
Biraz aýyp görülmezmi?

Ýa meñ göwnüm kirläpdirmi?!
Oýna, çyna düşmez ýaly.
Ýanyp gördüm, aýt, nädeýin
suwda agzym bişmez ýaly?!

Hemme zady çyndyr öýdüp,
Ýadadym agras pikirden.
Kä oýun etmekden gorkýan,
Duýgym geçer öýdüp serden.

Derwüş dek älem saýlanyp,
Gezsem göwnüm ýorulmazmy?
Bu barlygy oýun saýsam,
Çynyñ boýny burulmazmy?

Gülälek MERETMYRADOWA.