Çynyñ waspyny ýazýaryn! / goşgular

■ Halkymyzyň merdanalyk mekdebi

Oguz hanyň wesýetinden gaýdany,
Halkymyzyň merdanalyk mekdebi.
Gorkut ataň boýlarynda aýdany,
Halkymyzyň merdanalyk mekdebi.

Batyrlaryň erki beýik binýady,
Ýurda söýgi gerçek göwnüniň şady,
Şol belent söýgüden alandyr bady
Halkymyzyň merdanalyk mekdebi.

Watan goran är ýigitleň sözünde,
Eneleriň, gelinleriň gözünde
Döräp, rowaçlandy ýurduň özünde,
Halkymyzyň merdanalyk mekdebi.

Görogly, Alp Arslan — gözbaş çeşmesi,
Şükür bagşy — parahatlyk teşnesi,
Ýol-ýörelgäň tüýs jüpüne düşmesi,
Halkymyzyň merdanalyk mekdebi.

Pederleriň owal-ahyr isläni,
Dillermiziň soňlanmajak dessany,
Arkadagyň jennet Türkmenistany,
Ata-babalaryň baky messebi,
Halkymyzyň merdanalyk mekdebi.

■ Ýürekdeşim, kän gözlänim

Sabrymyň ýüzi saralyp,
Kanagatym terk edende,
Duýgulam menden ar alyp,
Taşlap uzaga gidende,

Men bir ýürekdeş gözledim.
Sözlämde sözüm diňlejek,
Syrdaş gözläp her ýan bakdym.
Bilýän, derdimem ýeňlejek,

Meni diňlejegem tapdym,
Wah, ýöne oňa dözmedim.
Tebil tapan duýgularym
Taşlap gidende tazygyp.

Men syrym açsam, syrdaşym
Gamlansa bolar ýazygym.
Ýürekdeşim, kän gözlänim,
Sen meň derdimi dözmänim.

■ Ýagyşly gün

Sowuk damjalarny paýradyp ýere,
Ýagyş ýagdy, howa sowady birden.
Çyg çeken duýgulam sygmady sere,
Yrandy ýükünden ýegşeren gerden.

Jaýlaryň üçegi, baglar ezildi,
Guşlar saýramasyn bes etdi, dymdy.
Bulut bilen üstün örten nurly Gün
Dynjyn almak üçin gözlerni ýumdy.

Ony oýarmaga synanşan şemal,
Çarp urdy. Wah, ýöne bary biderek.
Ýagyşdan soň uzak garaşylsa-da,
Asmanda Aý dogdy güneşe derek.

■ Ýalňyz hemdemim

Men ýene ýalňyz bir özüm
Gelerňe garaşyp juda,
Bir nokada dikip gözüm,
Ukudanam düşüp jyda
Garaşdym, ýöne gelmediň.

Gijedir gündiz hemişe
Duýmadyň meň garaşanmy.
Aňym bilen duýgularmyň
Öýkeleşip ýaraşanny
Asla aňmadyň, bilmediň.

Inçelen umyt ýüpüme
Sözler saýlap, monjuk düzdüm.
Düşen ýalydy jüpüne,
Bulaşdy, umydym üzdüm,
Kejikdim hem ejizledim.

Sensiz duýgulam bulaşyk,
Umydym ýüp dek çolaşyp,
Gelseň uzak ýollar aşyp,
Erär meniň gaýgym-gamym,
Ýalňyz hemdemim, ylhamym!

■ Çynyň waspyny ýazýaryn

Gala kimin gallanmadyk
Daşym goragsyz ýalymy?!
Owalbaşda ýollanmadyk
Hemdemim duýmaz halymy.

Berdaşly sözendir öýdüp,
Söýget edip söýenenim.
Sypal eken ýumşak, göýdük
Arka diräp daýananym.

Yşkyň guran daragtynyň
Gülleri solan ekeni.
Meniň togap eden çagtym
Seretsem ýalan ekeni.

Oraçada ýakan şemim,
Ýardam bolar galamyma.
Çynyň waspyny ýazýaryn
Bakyp ýene ýalanyma....

Gülälek MERETMYRADOWA.