Goşgular

1.

Dünýe malyn wada berip bilmerin,
Aýy-Güni ýa-da, berip bilmerin,
Eý sen, ölüp-öçüp söýen dilberim,
Ýassygmyň ýarysyn saňa bereýin.

Kalbymy bereýin – gözelligini,
Söýgimi bereýin – gönezligini,
Duý sen, janu-dilden söýenligimi,
Barysyn, barysyn saňa bereýin.

Derek boýlym, gül ýakasy keşdelim,
Seňki bu dünýäde görüp-eşdenim,
Gaýgy-hasratymyň belli möçberin,
Gülkimiň känisin saňa bereýin.

Seňki çemenlerim, ýolup gidenim,
Seňki büdüränim, dalyp gidenim,
Sensiz gowy meniň solup gidenim,
Ömrümiň manysyn saňa bereýin.

2.

Gaharly gyzlary halamaýardym,
Degişgen gyzlara bakdym gaharly.
Bilmändirin toý deý sowlup barýanyn
Ýaşlygmyň gaýtalanmaz baharnyň.

Şol ýylgyran gyzlar, gaharly gyzlar
Bolup galdy meniň üçin elýetmez.
Günler ýelpewaç deý aýlandy tizden,
Olar meni unudandyr, elbetde.

Yşkyň allaryna düşünmändirin,
Ýogsa düşbüjedim, süýt saç kempirler
Diýerdi: “Düşbüjäm, taňryýalkasyn,
Ýamanlyk ýüzüni görme her pille”.

Gowy düýş deý ýorlup giden o günleň
Bary bolan ýaly dara-direde.
Gyzlara hat ýazdym açyk göwünden,
Talyp ýyllarymda kwartirada.

Ýaşlygyň güneşi şuglasyn kemip,
Asmany ak bulut örtdi endigan.
Men şol ýaşlygyma,
ýaşlygym deýin
Geçip gitjek şol buluda bendiwan.

3.

Bagşysyny sylamadyga
Toýda kyn bolar.
Goňşyny sylamadyga
Ýasda kyn bolar.
Ýagşysyny sylamadyga
Has-da kyn bolar.

4.

Ýaş aksa-da didesinden
Güler Täji, Täjibossan.
Aý deý dogup gijelemde
Solar Täji, Täjibossan.

Gamgyn göwnümiň turajy
Bolar Täji, Täjibossan.
Ýeller derdimiň dilmajy
Bolar Täji, Täjibossan.

Özün ýatlaýanym zol-zol
Biler Täji, Täjibossan.
Eder meniň üçin ýoldan
Dileg Täji, Täjibossan.

Ýüregni pygan-zaryna
Diler Täji, Täjibossan.
Ilki ölsem, mazaryma
Geler Täji, Täjibossan.

5.

Başymda gyşyň gamlary,
Ýazym, sen alysdamy?!
Sowuk ykbal agşamlary,
Közüm sen alysdamy?!

Başym ýeke, derdim müňdür,
Dünýäniň ýollarna siňdim.
Aýdym deý ýaňlandym, diňdim,
Sazym, sen alysdamy?!

Ýollar yrak, laýy goýy,
Gözümden ýaş boýur-boýur,
Ýaşlygym – şatlygym, oýun –
Bazym, sen alysdamy?!

Ölümi bilen direler
Şahyrlar.
Bolsam biri olaň.
Kim men? näme men? nire men?
Özüm, sen alysdamy?!

6.

Ýaşaýşyň baky baýdagy,
Ýaşaýşyň altyn halkasy,
Garagumuň üstündäki al çeşme –
Dünýäde gudrat ýokdur,
Eger türkmen Güni gudrat bolmasa.

Ata-babalaň ruhy,
Dünýäň ülpüldeýän yşky,
Bakylygyň çelgileri
Dünýäde gudrat ýokdur,
Eger türkmen güli gudrat bolmasa.

Garyp nepesleň täjidir,
Ömrüm diňe şoň pajydyr.
Ýoklugymda meni diri saklajak,
Hemra, hemaýatkär, medet –
Dünýäde gudrat ýokdur,
Eger türkmen dili gudrat bolmasa.

7.

Bagtdan ýaňa täleý bizi,
Sähra sary getirirpdir.
Güýzüň egsilmez derdinden
Sähra sary getiripdir.

Men şol sähraň bendiwany,
Sähra çalymdaş durmuşa.
Ýollar meniň merdiwanym,
Gitsem dyrmaşa-dyrmaşa.

Men ýaşaýşyň bendiwany,
Ajal meniň gözlegimde,
Gözleginden çykmaz many,
Gizlensem ýar gözlerinde.

8.

Men seni görüpdim iň soňky gezek,
Sen maňa naýynjar garapdyň şeýle.
Bol gyz, gara gözlerimiň röwşeni,
Uçuradan derdiňe gel, kömek eýle.

Men seni görüpdim iň soňky gezek,
Diňläpdim aýdymyň – näzijek heňiň.
Ýygralygyň girdabyna gark bolan,
Tümlükde ýitiren arzuwlam meniň.

Men seni görüpdimn iň soňky gezek.
(Ýatlamalam çeşme bolup çogsalar)
Şonda ulugyzdyň,
Özgäň töründe,
Gelinkäň her günde görýän ýogsa-da.

9.

Arzuw eýläp, rowana kyl,
Ýollara göwnüm meni.
Dözmäweri gara pygyl
Allara göwnüm meni.

Ömür yşdyr ýaldyr-ýuldyr,
Ganatlan, döwralan, ýylgyr,
Garratdyrman hergiz ýyldyr –
Aýlara göwnüm seni.

Ömür gysga, dünýe pany,
Ölçemek üçin wepaňy,
Görüp bolsady ýüz ýaly,
Aýnada göwnüm seni.

Sil men, akaryn seslene,
Ýaýlaga, düzge, peslere,
Sen böwet bolup bekleme
Baglama göwnüm meni.

Oturmakdan boldum dagdy,
Şahyrlaryň ýolda bagty,
Duçar et ýaşyl hem ýagty,
Ýazlara göwnüm meni.

Uýdum il-günüň pendine,
Epgekde ýüzüm tendi meň,
Oglanjyk däl-ä indi men,
Aldama göwnüm meni.

10.

Şeýle-de bir gussa bolarmy, dostum,
Dostum, dymma bormy şeýle üznüksiz.
Neçüýn gözleriňe gamdyr gussalar,
Misli ýadaw serçeler deý düzlüpdir.

Nämä gamlanýarsyň aýny ýaşyňda,
Saplan, gussalardan bag kibi saplan,
Taplan ýaşaýyşyň çalgy daşynda,
Ýatma guraýşy deý şol ýalpaň ýaplaň.

Boý al!
Çynar deý şemala döş ger seleňle
Oýlan!
Hem gynanma bu jahana gelenňe.

Çal dutary, al dutary eliňe,
Aglat Ýeseniniň gitary ýaly,
Serde ýagmazak bulut deý gussalaň,
Ýagyp,
ýagyp,
ýagyp
gutarşy ýaly.

11.

Tötänlikdi biziň duşuşygymyz,
Ötägitdi gep-sözümiz alyşyp.

Sen bar, çüýşe asman, ýalazy kenar
Hem bar ýyldyza deň uzaýan deňiz.

Gül dek sen, ysyňa meýmiredim men.
Ýyljak sen, ýumşak sen deňziň suwundan.

Bor ýaly däl näzikligi bedeniň
Gor ýaly sen, üfläp kalbym ot aldy.

Tümde ýyldyrym däl, çakdy ýaşlygyň.
(Dünýe, men nämäniň şaýady boldum).

Gülleriň aly seň süýji lebleriň,
Sülleren ýaly sen sähel salymda.

Sen näme özgerip gitdiň beýle tiz,
Degnaňa degdimi töwekgelligim.

Ýylgyrmasaň, göwnüm gider girdaba,
Dilgirmi sen bizi duşuran gijä.

Gözleň – goşa sözlem, neçüýn gaýgyly,
Dözmen seniň dolanmajak ýaşlygňa.

Ýakmaz şeýle bagtdan soň aýralyk
Hatlar müňden birin eltmez mähriňden.

Gamam ýok, gussa-da ýok ýaly, ýöne
Samolýot arada aýralyk goýar.

12.

Äkit meni, bedewim,
Galdyrma orta ýolda,
Elwan öwüssin bedeniň
Derden, gözýaşdan däl-de.

Göbek ganym, ak derim,
Ýaşara berdiň gerim,
Eý, mukaddes Watanym,
Eý, keramatly Ýerim.

Umyt kölüm çalyksa,
Ýagmyr bolup ýagan ýar.
Galmaweri alysda,
Saňa söýgim, syrym bar.

Agşam düýşüme giren
Eli çörekli käbäm,
Bahar dek umyt beren
Säher ýürekli käbäm.

Men seň ömür dowamyň,
Başlangyjym pederim.
Ýagşa kylyp togaby,
Däbiň dowam ederin.

Dostlam – gözüm röwşeni,
Ilim – mährim gananym.
Sizsiz açyk asmana
Galkmaz goşa ganatym.

Ýaşlyk, senden dilgir däl,
Täleýimden däl nadyl.
Ýeňişlerde yhlasym,
Ýeňilsem hatam bardyr.

13.

Ylham guşum, ýene saňa sataşdym,
Ataşly gözleri nar bolup geldiň.
Otlaň arasyndan kömelek tapan
Horaşaja oglanjyk deý begendim.

Äkit meni hol görünýän daglaryň,
Belent ýerleriň çuňluklaryna.
Mähri güneş adamlaryň ýanyna,
Ýör, belet bolaly kimdiklerine.

Köňüllerde közler bolup köräli,
Çaýly käselerde nabat bolaly.
Ýoda bolup uly ile birigýän,
Azaşan biçärä gabat geleli.

Jyklap tüýnüginden ýaz bolup gyşyň
Çözeli topragyň, ýürekleň doňun.
Göreji perzende zar bolan gelniň
Bolaly elinde eýjejik ogul.

Bu durmuşdyr agyr günde galaýsak,
Diýme “Sen git, özüm ýalňyz galaýyn”.
Aýralyga niçik döz geler ýürek,
Hem niçik bor sensiz meniň täleýim?!

14.

Asmandan zemine sary
Adam boýy ýere süýşem.
Maňa dahylsyz bor bary:
Sähralar,
baharlar,
düýşler.

Dünýäň ýagty,
ýagşy,
ýaşyl,
ýaz,
ýag
Gujagyndan uçsam,
Ýürekde dert, gözde ýaşyň
Üçürin günämi geç sen.

Penjireden seň ýanyňa
Ýapraklar düşende gaýyp,
Unudylan mazaryma
Şuglasy düşende Aýyň.
Çalyşsa meni ýatlamalar,
Gamgynlygyň pelsepesi,
Ter hakydaň gatlaryndan
Ýalňyzlygyň gelse sesi

Gara,
garaňky,
gazaply
Gijelerden etme heder.
Şonda seni ýeke goýman
Ýaş kalbyňa goýan gaýmaň –
Aýdymlarym halas eder.

15.

Elwan köýnegini geýen sährada
Gülki çykýar bu zeminiň teýinden,
Şol gülleri görüp göýä diýersiň
Başy serhoş bolan şatlyk meýinden.

Gandymlar döş gerip mymyk şemala
Saldylar aýagna çopan badagyn.
Keýigokaralar bälçik gyz ýaly,
Gülüp diýýär: “Şatlyk däl-ä gadagan”.

Saýasynda söýgi ýatan sazaklar,
Gussasyn kürte deý sypyryp serden,
Unudyp üznüksiz ýatlamalaryn,
Bu ajap pursatda şatlandy bir dem.

Ter güli, çomujy, çaňly ýodany,
Sazagy haýsy güýç şatlyga itýän?!
Ýaz ýagmyry gyjyklaýan bolarly,
Sähraň çagajyk deý gülküsi tutýar.

16.

Bulutlaryn burugsadyp tüsse deý,
Asman uzaklarda çakdy çakmagyn.
Az-kem egismäge gamdyr-gussasyn
Çilim otlanandyr öýdüp çakladym.

Buýra bulutlary gamçylan şemal,
Öz yňdarmalygyny eýledi aýan.
Suw syrygyp gaýtdy ýyldyrym deýin,
Üstünden ter baglaň, hol ýylçyr gaýaň.

Sähra höwes bilen gerdi kükregin,
Döşi san-sajaksyz syrly ýodaly.
Buýmaklyk howpundan gorkan çöketleň
Hem depeleň uçuklapdyr dodagy.

17.

Tomsuň miwesi daýanjyň bolsun,
Gurply gollaryndan gaçanda ysgyn.
Güýz gelende – saralanda bu dünýä
Baglaň aglaýşyna ýüregiň gyssyn.

Ýüregiňe ylham, derdiňe melhem
Al gyş päkliginden, tämizliginden.
Görüp ene ýeriň arassalygyn,
Ýa göwnüň geçýärmi kämilligiňden?!

Adam ogly, salma ýürege dowly,
Bahar heserinden gel-de joşa sen.
Aýt, hany ne arman bar köňlüňde
Tebigatyň özi bolup ýaşasaň.

Gurbandurdy ORAZOW.