"Kakam gül sährany düşenip ýatyr"

***

Kakam gül sährany düşenip ýatyr,
Zemin – ýumşak düşek, asman – ýorgany.
Dünýäň ýüregine düşünip ýatyr,
Golaýynda Ata Köpek Mergeniň.

Olaryň täleýem meňzeşdi,
ýöne
Kakam derdin söze öwürip bilmän,
Öwrüldi-de gumdan çitilen göle,
Dyndy azabyndan eşretli dünýäň.

Ömür tüňçesiniň gaýnagy syndy,
Umytlary ýyldyz ýaly üzüldi.
Oňa dertler içire ýaşamak kyndy,
Bize bolsa kakam barka hezildi.

Kakam gül sährany düşenip ýatyr,
Batyp gül-çeçekli lälezarlyga.
Dirilerden gowy düşünip ýatyr,
Ölümden aňyrda näme barlygna.

Gurbandurdy ORAZOW

#«Hijran Halkasy» kitabyndan 5-nji goşgy.