Myhman

MYHMAN

Garyp çatmam-döwlethanam,
Şoňa gadyr goýan gelsin.
Hoş niýeti-diňle, janam, -
Gursagyna guýan gelsin.

Garyndaşmy, ilen-çalan,
Getirmesin gybat ýalan.
Mäşim bişmez onuň bilen,
Baryn daşda goýan gelsin.

Öz-özüne bat bermesin,
Töweregne ot bermesin.
Ýakyn görsin, ýat görmesin,
Dogry söze uýan gelsin.

Çynar bolmaz ak derekden,
Ganat bolmaz batbörekden,
Ant içmesin duz-çörekden,
Jandan dogan diýen gelsin.

Sözlemesin kiçi dilden,
Müň bir hünär gelsin elden,
Bagtyn gözläp atyz-pelden,
Eline gan öýen gelsin.

Öýe dolsun çölüň ysy,
Goýny tämiz ýeliň ysy,
Kükäp duran gülüň ysy-
Sähralary söýen gelsin.

Mert üýtgemez ýazda-gyşda,
Saçakbatyr dursun daşda,
Gonak gelse,ozal başda,
Il derdine köýen gelsin.

Söwer dosta gurban janym,
Gaýgyrmaryn hany-manym,
Kyn günümde döwüm nanyn,
Deň paýlaşyp iýen gelsin.

Ýagmyr PIRGULYÝEW.