14:52 Oka / goşgular | |
OKA
Hyjuwlarym kükregime sygmasa, Aýdyp başarmadyk sözlemden oka! Yşkyň ody otlyçöpsüz lowlasa, Sen ony günäsiz gözlemden oka! Hyýalymda bedew ata atlanyp, Galan bolsam orta ýolda saklanyp, Hakydaňda ömürboýy çaýkanyp, Akýan däli-porhan sillerden oka! Ahmyrlaryň ummanynda gark bolup, Kä pessaýlap, käte asmana galyp, Bu zenan kalbymy heýjana salyp, Zülplerimi öpen ýellerden oka! Gör, bu günler gussa boldy hemdemim, Nepesime kybap saýyp her demiň, Gözün ýola ýazyp söýen dilberiň, Çeken hasratyny ýollardan oka! ■ ÝANYŇA BARÝAN Pynhan duýgularmy nabat deý ezip, Men ýene-de seniň ýanyňa barýan. Söýgimi uşakgöz elekden süzüp, Men ýene-de seniň ýanyňa barýan. Gökde durna ganat ýaýyp geçende, Ýalňyz ýürek gam badasyn içende, Durmuşdyr bi, birden göwnüm çökäýse, Men ýene-de seniň ýanyňa barýan. Intizar garaşýan ýola seredip, Gyrawlan köňlümiň buzun eredip, Heniz ýazylmadyk şygyr döredip, Men ýene-de seniň ýanyňa barýan. Şahalar pyntyklap, garşylap ýazy, Ýapraklar pyşyrdap çalanda sazy, Ýürek urgusyndan alyp owazy, Men ýene-de seniň ýanyňa barýan. Günlerimi oý-pikirde ötürip, Bagtyň meýli pyýalasyn göterip, Söýgi derýasynda özüm ýitirip, Men ýene-de seniň ýanyňa barýan. ■ SOWAL Gözüm nurun ýazyp goýdum ýoluňa, Gurulmadyk tagtym bolup gelmezmiň?! Heniz guş gonmadyk gülşen bagyma, Açylmadyk bagtym bolup gelmezmiň?! Hyýaldyr ol — meni arşa göterýän, Mahal-mahal bagt atyna atarýan, Özümi müň tapyp, müň bir ýitirýän, Gözüm bolup, gaşym bolup gelmezmiň?! Keşbiň mydam duransoň göz öňümde, Ýatlaýaryn aýdymymda, heňimde, Döwran sürmek üçin yşkyň köşgünde, Zöhre bolsam Tahyr bolup gelmezmiň?! Ilki düýşde, soňra huşda saýlanym, Aýdyp bilmän kösenýänim aňýansyň, Heniz aýdylmadyk aýdym aýdaýsam, Çalynmadyk sazym bolup gelmezmiň?! ■ HALYM GALMADY Ykbal öwrümlerin aýlap serimde, Otyryn keşbiňi gizläp gözümde, Läle-reýhan açylan ýaz gülümde, Neden gelip aşyk bilbil gonmady. Ilden ogryn syrym alyp gerdene, Ýatlap ýörün her ädimde, her demde, Ýagyş damjasyndan alyp bir damja, Lebime çalara halym galmady. Paşmadyk söýgüniň sowuk manzary, Gör-ä, ýada salýar sowlan bazary, Ýyllar goýup gitdi kalba azary, Neden pynhan derdim soran bolmady. Jogapsyz galaýsa ynsan duýgusy, Manysyzdyr Aýyň, Günüň dogmasy, «Bu-da geçer» diýip, Arşyň çabgasy, Bir dem guýup, gamly başym ýuwmady. Arzuwyň çägini bilmämsoň tapyp, Ýürek ýola bakýar, gursakdan çykyp, Ähli böwetleriň serhedin ýykyp, Gelmeseň, durara sabrym galmady. Sen meniň arzuwym, arzymanymsyň, Derdimiň dermany, hany-manymsyň, Garybym bol, men bolaýyn Şasenem, Söýgümi ýitirlen ýyllardan oka! ■ ARZUWLARYŇ BOLAÝYN Bilbili sem etjek heň gerek bolsa, Men seniň «Nowaýy» sazyň bolaýyn. Ýol küýsän gözleriň ýol tapman galsa, Men seniň didäňde nuruň bolaýyn. Açyp ýüregimiň gatlaryn saňa, Köňlüň düýp töründe baky galaýyn. Heserlän kalbyňa aram salmaga, Damarda aýlanýan ganyň bolaýyn. Öýke-kineleriň ýazmaga her dem, Sesiň eşdip, alyslardan geleýin. Ýaşap ýörseň bu jahanyň ýüzünde, Ganat kakan arzuwlaryň bolaýyn. Arzuw-umytlarym diňe seniňki, Ýüregiň töründe baky galaýyn. Dil bilen däl, gözleň bilen aýdara, Gülden näzik duýgularyň bolaýyn. Sen hakynda aýdymlarmyň barysy, Goşgulamdan saňa çemen bogaýyn, Humaý guşuň ganatyna atlanyp, Meň bagtyma doglan günüň bolaýyn. ■ TÖRÜNDE GÖRÝÄN Al-ýaşyl sährama seýle çykamda, Hyýal guşum ganat kakyp asmanda, Ýatlamalaň ýaýlasyna bakamda, Seni aşyklaryň baýrynda görýän. Bahar gelse, güle bürär sährany, Ýör, ikimiz bolaly oň myhmany, Yşkym bilen syryp gamhor dumany, Seni göreçlermiň nurunda görýän. Päk söýgümdir, bir özüňe bagş etjek, Gözlerimde öýdäp, kalba nagş etjek, Sen diýip geldim men, sen diýip ötjek, Günleri ýüregmiň töründe görýän. ■ ÝATLAMA Düýn ýalydy başky söýgüň heseri, Elimden gaçyran darak, keseri, Şowly jemläp, wah, şol ýowuz eseri, Geçen günler dolanaýjak ýalydy. Hala çitip, müň bir syrly öýdümi, Ýaşlyk kalba bitmejek dag goýdumy, Ykbalymyň aýdylmadyk aýdymy, Ilki söýgim dolanaýjak ýalydy. Gamly günler geçdi, gopsa-da her tap, Syýasyz, kagyzsyz ýazyp bir kitap, Şo:l juwan ýaşlygy yzyna tirkäp, Bagtly ýyllar dolanaýjak ýalydy. Aýlar, ýyllar kän geçse-de aradan, Neden beýle garaşmakdan armadym, Düýşüň zyndanyndan gaçyp şazadam, Bir pursatlyk dolanaýjak ýalydy. ■ HYÝAL Yşk derýasyn ýüzüp ýetsem kenara, Bir özüm galmakdan howatyrlanýan. Ünsüm sowup bilmän, özge hyýala, Ömür oýlaryna öwrülýär dünýäm. Arzuwlarym kösük deýin gizlenip, Yere bagryn oýkap, çümýär hyýala. Bak, ýola çykypdyr gursakdan ýürek, Söýgi ýollaryny yzlap pyýada. Ykbal öwrümleri şineläp serde, Ne bir karar tapýar, ne günüm ýaşýar. Pynhan syrym aýan eden igdeler, Heserlän yşkyma gönezlik gatýar. Demim burjusyny ýazdyryp gyşyň, Umyt gämisinde elewräp dur-la. Teselli bermäge tapmansoň melhem, Ötegçi dünýäni öwürip şygra. Indi besdir, sensizlikden ýadadym, Umytly günleriň ýumagyn sarap. Pursat ber, ezizim, çykaýyn ýola, Galmaýyn kenarda sensiz tebsiräp. ■ ÝENE GELDIM Ýene geldim gülälekli meýdana, Ýaýlalar owadan, tebigat gözel. Neden beýle kalbym geldi heýjana, Zybanyma berip ajaýyp gazal. Täsin yşkyň kükreginden dem alyp, Açylypdyr ýüregimiň gunçasy. Gijeleriň tümlüginden ýol salan, Setirlerim tämizligiň damjasy. Gamdan başyn saplan owadan baglar, Gök kürtesin atynypdyr başyna. Gussamy şatlyga öwüren çaglar, Dyza çökmüş, gelip bu gün gaşyma. Şygyr dünýäsine taşlap özümi, Ýurek owazymy siňdirdim tara. Al-asmanda dogan mahy-tabanym, Pynhan syrlarymy ýetir sen ýara. ■ ŞYGRY BOLUP GALAÝYN Söýüp ýaşaň, söýlüp ýaşaň, arkalaşan dag aşar, Göwünlerňiz burulmasyn, bürülmesin ýaý gaşlar, Uç-gyraksyz sähra sygmaz yşka düşen bu başlar, Bir ýigidiň, bir ýüregiň ýary bolup galaýyn. Ýagşylyk et, bu dünýäde diňe yhsanyň galar, Pederlere dowamatlyk, kalba nur bolup dolar, Il bilen il bolup gitseň, sarpaň has arşa galar, Öz ilimiň bossanynyň nary bolup galaýyn. Keramatdyr bu tamdyrlar, barabardyr öwlüýä, Ýüze sylyp, doga etseň, derdi-belaň sowulýa, Säher turup dileg etseň, kalba ylham guýulýa, Öz öýümiň, öz ojagmyň çogy bolup galaýyn. Ak un sepip ak kejebä, galkynanda göwünler, Käbäň dek pata alaňda, bagta dolar bu günler, Bilseň yhlasa görädir dowam tapjak ömürler, Bu türkmeniň abraýly gyzy bolup galaýyn. Çagaly öý bazar bolar, balalar baldan süýji, Çaga başyn egýändir bu külli älemiň güýji, Ak sallançak ak öýleriň, köňülleriň söýenji, Käbelermiň nabat bilen nogly bolup galaýyn. Şygyr bolup dünýä geldim, şygrym bilen giderin, Goşgularym — bar baýlygym, dosta serpaý edenim, Zenan kalby düýpsüz umman, açyp onuň güzerin, Läle-reýhan Garagumuň ýazy bolup galaýyn. Aýdym-sazyň bar ýerinde daşda galar gam-gussa, Belent ruh bu türkmene ýaraşykdyr, elkyssa, Darak kakyp hala salan gölüm äleme nusga, Şükür bagşyň dutarynyň tary bolup galaýyn. Rowaçlyga besläp bu gün Hydyr gören ýaýlany, Ula salan bedewleri, baglar herki aýlawy, Şu Watandyr şahyr gyzyň ömre dowam saýlany, Arkadagly ak ýollaryň şygry bolup galaýyn. ■ WATAN Göbek ganym, galpak saçym dözülen, Aşyk bolup seň nurana roýuňa. Diňläp sallançakda ene hüwdüsin, Eziz Diýar, girdim seniň goýnuňa. Ene süýdi bilen jigere siňip, Soňam aňa ornanym sen bir kemsiz. Yhlasym inensoň Arşy-agladan, Men ýaşap bilmerin Watanym sensiz. Heniz ganym aýlanýarka damarda, Dänäňdirin — siňip gitjek topraga. Togap edip, maňlaýymy diränim, Medet ber goýnuňdan özüm tapmaga. Sensiň meniň teşne kalba mirabym, Gel, bir dem bagryma basaýyn seni. Bir ömre barabar pursat ber maňa, Söýmäge söýşüm dek käbäm enemi. Beýikligiň hergiz durmaýar çakda, Ömür salym seniň bilen badaşar. Ynamym, ygrarym hem seždegähim, Watan! Topragyña kalbym ornaşar. Mahmal sähralaryň gözümiň nury, Dutaryňa tardyr saba ýelleriň. Eziz Serwerimiň yhlasy siňen, Bu dünýä nusgadyr ýüpek ýollaryň. Atalaň namysy, paýhasy siňen, Jigerde janym sen, beýiksiň, Watan! Sen gözümiň nury, dillerde sena, Hem gursakda urýan ýüreksiň, Watan. Azatgül HOJABERDIÝEWA. | |
|
√ «Отвергнув гордое сомненье…» / Goşgular - 29.02.2024 |
√ Moskwadan görýärler / Goşgular - 30.01.2024 |
√ «Превратила всё в шутку сначала…» / Goşgular - 29.02.2024 |
√ Şemally gün / Goşgular - 27.01.2024 |
√ Mürze ýigit / Goşgular - 12.03.2024 |
√ "Diýdiñ: Gelin bolup görkezeýinmi?.." / Goşgular - 14.02.2024 |
√ Sumbaryñ kenarynda / Goşgular - 01.01.2024 |
√ Yzany yşkyma ýamag etdim / Goşgular - 15.04.2024 |
√ Was-wasylara... / Goşgular - 23.01.2024 |
√ Rubagylar / Goşgular - 01.01.2024 |
Teswirleriň ählisi: 1 | |
| |