Yzany yşkyma ýamag etdim

YZANY YŞKYMA ÝAMAG ETDIM

Wagt gutarýar.
Ähli sagatlar gumsagadyñ içinde biri-biriniñ yzyndan zymdyrylyp barýar.
Ýasama bagtlylygy geýinýär sözler.
Sen-men söweşinde ýeñilliksiz ertirlere häzirden açýaryn gözlerimi.
Söweşerlik derejede-de ýakyn däldigmizi bilýän.
Bilýän, gynandyryşyñ munça sözi tapdyrýanam.
Ömrümi ömrüñ yzynda süýreýänem...
Aýnasy döwüldi bagtlylygymyñ.
Söz diñlemezek hüýümi indi gowy tanaýan.
Aýagym ilişýär agyry-ynja we ýoklugymyñ üstüne düşýän.
Şindizem üşeýän...
Iññäniñ gözünden geçirýän yşky.
Sen bolýañ nagşymyñ ady.
Bir demde sen bolýan düşünjesiz, urdum-duýmaz...
Soñra maña dönýän. Seret häzirem aglaýan...
Harpma-harp dokaýan kelimelermi,
häzirden ýerleşdirýän gynançlarymy barmagynyñ ujuna.
Soñky düşen çygy-da bölýärin paýyma.
Ýumýan gözlerimi.
Hany, gitsene ýar, gelşiñ ýaly.
Awundyran ýeriñden ähli yzalarymy-da alyp gitsene.
Düşünmedim ýar, Sen ýar bolmadyñmy ýa-da men ýaranlykdan uzakdym?
Haýsy kenara urupdy aramyzdaky ýetmeýän şol daş?
Haýsy aýdymda ýarpy galypdy notamyz?
Haýsy setir içine sygdyryp bilipdi-de seni,
sen tapylmazym bolduñmy?
Ah, ýar, saña baglamasam sözümi,
hemişe manysyzlyk bolýar ýüregimiñ dili.
Saña baglananda-da gözýaşyña ugurdaş bolýar.
Ýokmy öñümde senden gaýry gidiljek ýolum?
Içim ýene öñki setirleri gaýtalaýar...
Gerişlerimde senli gözel güzerim bar
Ýöne düýşlerime damýan awy-da sen ýar
Tapyp bilmedim ýar.
Seni şunça gözlesemem, özüme bagtlylygy tapyp bilmedim.
Wagtdan ýekän-ýekän ogurlap, sagatlary syzlaýan ýanlaryma gatdym.
Men yzany yşka ýamag etdim.
Ownuk saýmadym duýgulary.
Çola çüñklerde ölýänçäm sakladym söýgimi.
Yzady tanyş yşkymyñ öñki ady. Hiç bir şähere sygmady ýüregim.
Stambul, sejem ýüregimi aýaklaryma iltediñ.
Hem sen ýykyldyñ, men ganadym.
Ezildim, ýarama ýene gojaman şäheri basdym.
Çuñ ukudan ybarat sandym setirlerde ýaşamagy.
Kelimeleri urdum çägeliklere.
Janymy awutdym yzynda.
Hem ýene bir daş zyñdym içimiñ garañky dälizine.
Gussañ mesgenine kilitli yşk haýsy mertebäni kabul ederdikä sözlerine?
Haýsy ýaram düýşlerini saña uranymda yza damdyrmaýardy?
Hakykatymda bolmadyk ýar köñlümdenem git!
Bol, gitsene! Men goduklan şäheriñ harabasy bolmaga razy.
Men, ýene garabasmalar saklaryn ýassyklarymda.
Hem saña şygyrlar toplamakdan el çekerin.
Sessizligimiñ sesini diñleýän güýz gününiñ säherinde...

Kahraman TAZEOGLY.