Özüme

ÖZÜME

Goý, diýsinler: «Ýalançyda ýaşara
Biraz hile, az-kem öwrüm bolmaly».
Meniň iki dünýe iň uly gaznam
Arassa, neresse göwnüm bolmaly.

Bir ýanda howsalam-hederim bardyr,
Bir ýanda howalam-heserim bardyr.
Ýüze tutjak ýalňyz eserim bardyr —
Ol çeper ýaşalan ömrüm bolmaly.

Aman diläp dünýäň derdeserinden,
Umyt etdim Arşyň merhemetinden.
Düşündim...
Ýer-göge erk ederim deý,
Öz-özüme erkim-emrim bolmaly.

Bolsadylar ekdim, ordum käşgädi,
Aňdyrmady pynhan dünýäň äşgäri.
Tijen, ýürek, diýme hergiz: «Giç dälmi?!»,
Ynam, yhlas hemram-höwrüm bolmaly.

Söýgüden örülmiş ömrüň rişdesi,
Hoş söz aýdan hoş sözleri eşdesi.
Göwnümiň buz tutmaz tereň çeşmesi,
Çep gursakda körän howrum bolmaly.

Kakamyrat REJEBOW.