Poeziýa

POEZIÝA

Haçan duşduk,
Haçan dogan okaşdyk?!.
Şol gün bagtym çüwdümi
Ýa-da ýatdymy bagtym?!.
Diýsem rastym,
Şu güne çen oýlanmandym bu hakda.
Megerem, biz duşan bolaýsak gerek
Ejemiň jadyly hüwdüsin diňläp
Ýatyrkam sallançakda.
Özüm bilelim bäri
Senem ýanymda.
Begenemde gülki bolup ýaňlandyň,
Gözýaş bolup ýere dolduň aglamda.
Käte-de bütinleý bolduň tersine.
Gülemde agladyň,
Aglamda-da gülüp gezdiň, görsene.
...Ýigit çykdym,
Kalba joşgun,
Ele galam berdiň sen.
Hem-ä meniň synmaz ganatym bolduň,
Hemem bolduň soň gelmez derdim sen.

Şeýde-şeýde getirdiň
Bir düşnüksiz günlere,
Käte daragtlara,
Guşdur güllere,
Sähradyr çöllere
Syrymy ýaýdym men,
Düşündi olar.
Käte ýürek bilen aýdan sözlermiň
Birini-de diňlemän,
Duşymdan ýylgyryp geçdi adamlar.

Gyzlaryň zülplerin taryp etmäge
Hepdelermi bagyşladym,
Hasabyny almadym.
Ýöne gözi ýolda galan bir gyzyň
Dodagyndan öpmäge
Wagt tapyp bilmedim.
Käte ýyldyzlara golum ýetirdim.
Käte golaýyma gol uzatmaga
Ýaýdandym ýördüm.
Seň bilen geçiren gijelerimi
Senden jyda düşen gündizlerimden
Has ýagty gördüm.

Saňa duşup,
Meniň bagtym çüwdümi,
Ýatdymy bagtym?
Bu sowala jogap tapyp bilemok
Şu wagtam.

Ogluma,
Gyzyma hoş sözler aýdyp
Hem golumdan düşürmän öz agtygmy,
Gezmeli wagtym meň –
Dost-ýarlam bilen
Deň-derman paýlaşyp tapan bagtymy.
Kä geçmişi ýatlap,
Kä meýlis gurap,
Kä süzüp şerap,
Gezmeli wagtym meň dost-ýarlam bilen.

Arman, senden sypур bilmesem nätjek...
Diňe seň yşgyňda gezýän humarlap.
Käte geçen,
Geçýän ýollarmy barlap,
Elim sowap,
Öz-özüme igenýän.
Käte-de özümden göwnüm hoş bolup,
Guş bolup,
Asmanda uçýan... begenýän...

Nirelere alyp barýaň sen meni?
Aýt maňa,
Barybir gaýry ýok ýolum
Ganatym bolsaň-da,
Derdim bolsaň-da,
Poeziýa,
Sensiň ýalňyz ykbalym.

Italmaz NURYÝEW.