Abdyrahym Zynhary

ABDYRAHYM ZYNHARY

Şahyryň ady we tahallusy: Abdyrahym Zynhary
Doglan ýeri: Lebap welaýatynyň Halaç etrabynyň Esenmeňli obasy
Doglan ýyly: 1791-nji ýyl
Aradan çykan ýyly: 1880-nji ýyl
Bilimi: Medresede

Gysgaça maglumat:

Zynharyň kakasyna Polat diýer ekenler. Oňa hormat edip, Polat baba hem diýlipdir. Polat baba sowatly adam bolupdyr. Ol ärsary taýpasyna, onuň-da ulydepe urugyna degişli bolupdyr, aňyrsy Mustapa gaza urýar. Zynhary oba mekdebinde sowadyny çykypdyr, şol ýerde-de öý-işik bolupdyr. Kesbi-käri boýunça Zynhary ökde demirçi ussa ekeni, öz hünärini özgelere-de öwredipdir. Zynharyň ogul-gyzy köp bolupdyr. Ýöne ikisinden özgesi çagalykda ýogalypdyr. Bu hasrat “Ýandym, ýaranlar” goşgusynda ýatlanýar. Zynharydan Razyýa atly gyz, Jumaguly atly ogul galypdyr.

Döredijiligi:

Zynharyň döredijiliginiň hususy sypatlary XIX asyr türkmen edebiýatynyň ösüş-özgerişleri bilen dialektiki birigýär. Şol bir klassyky çeperçilik simfoniýasynyň möhüm takty bolup durýar. Zynharyň eserleri saýlanyp-seçilip, özbaşdak ýygyndy görnüşinde ilkinji gezek 1945-nji ýylda neşir edilýär. Ilkinji neşir 1962-nji ýylda peýda bolýar. Zynharyny öwrenmekde H.Şahberdiýew, B.Garryýew, A.Nurýagdyýew, M.Annamuhammedow dagyň belli bir hyzmatlary bar. Zynhary hakynda Ý.Hudaýgulyýewiň romany bar.

Çeşme: XIX asyr türkmen edebiýaty. Aşgabat: Ylym, 2001. Sah. 154-159.

Taýýarlan: Aýlar NURMUHAMMEDOWA.