Bentler

• Üýtgetdi

"Üýtgedip gurmagy özüñden başla",
Başlyk bu sözlere bolupdy boýun.
Stol-kürsüsiniñ ýerin üýtgetdi,
A iş dowam edýär öñküsi deýin.

• Brigadanyñ bir ýyllyk taryhy

Gyşda meýdan işi gowy diýdiler,
Ýazda ekiş wagty gowy diýdiler.
Tomusda bejergi gowy diýdiler,
Gazetde-de öwdüler.
Güýzde plany dolup bilmedi,
"Howa erbet boldy" diýip öwdüler.

• Ar aldy

Göriplige düşüp, tutuş bir gije
Uklaman kän kagyz garalady ol.
Kagyz hem ar aldy - girensoñ güýje,
Özün garalany garalady ol.

• Derde ýaraýar

Abuna bagyş etdi tutuş aýlygyn,
Başlyk öwýär "nusga almaly" diýip.
Ol welin ýazylan gazetleriniñ
Adyny hem doly bilenok, haýyp.

Poçtalýon gyz zordan göterip gelýär,
Erjelligi bilen agramna bakman.
Onuñ welin nakyly bar öz uýýan:
Okamak hökman däl, ýazylmak hökman.

• Arakhoryñ hyýaly we hakykaty

Ganat diýip galgadýany elleri,
Onsoñ paşmaýardy uçmak hyýaly.
Ýöne çagasyny bagryna basyp,
Başyn alyp, "uçup" gitdi aýaly.

Rejep ARAZDURDYÝEW.

"Edebiýat we sungat" gazeti, 1988 ý.