Dileg

DILEG

Mäne babaň aramgähinde sere gelen setirler

Eý Ýaradan! arza-dilege geldim,
Arz diňleýän Arşyňdamy, Sen, bu gün?!
Ýa diýýärmiň: Zyýarata geldiňmi?!
Dil berdim: dileg et, agynsaň-agyn.

Toba, Taňrym! abyrsyz zat dilemen,
Akyl-huşum almasaň bor elimden.
Gözýaş edip taý soraýar ol biri,
Ýöne beýle söz çykmaz meň dilimden.

Ýa Biribar beren taýyňa şükür,
Ömürbaky razydyryn bagtymdan.
Gündizim ak dünýäm, rahat gijeler -
Dynç alýan meýmiräp durmuş aýdymdan.

Şükür, ýalňyz bolsa-da berdiň ogul,
Bagtym bar, uçmah deý maşgala gurdum.
Gürläp-nalap, başga zady soraman,
Durmuşyň jennetin öýümde gördüm.

Iki gyzym janym synmaz döwletim,
Olar ýogym-barym, namysym-arym.
Il-günüm-daýanjym, watanym-demim,
Şular meniň iki dünýede zarym.

Binesip bolmaýyn agtyk-cowlukdan,
Ömür uzap gitsin, neslim dowamat.
“Baýlyk eliň kiri”, ýöne zar etme,
Edewer iş rowaç, başy salamat.

Ýürekden bu arzuw: Omyn edewer!
Geçmesin bihuda ýigrim dört sagat.
Kalbymda men dyza çöküp ýalbarýan -
Bolsun il bagtyýar, watanym abat.

• Üçleme

Neslim dowamat, kuwwatym gözel ýar,
Şükrüm köp, ak bagt içinde ýaşaýan
Watanym parahat, ajap ýurdum bar.