EJE
Dertli daragtyň ýapragy meň üstüme gerinmezmi,
Bu dünýäniň bar gaýgysy meň üstüme sürünmezmi,
Sensiz maňa ýagty jahan tümden gara görünmezmi,
Sen bolmasaň meň ýanymda mähribanym käbäm eje.
Seniň bilen dogar günüm, seniň bilen dogar aýym,
Sensiň maňa bu dünyäde bagtdan berlen uly paýym,
Bir ýylgyrsaň ýylgyrşyňa bütin älem bolar maýyl,
Ýylgyrşyndan nurlanýandyr göreçli didelem eje.
Yhlasymy artdyransyň her işimde goldaw berip,
Gije-gündiz bagt dilap Biribara goluň serip,
Sowgat bersem kabam saňa jennet bagyndan gül terip,
Jennet aýagyň astyndadyr sen Jennetiň güli eje.
Üstünlikler gujak açar keramatly dilleriňden,
Dogalaňdan ýeňişlerem geçe bilmez men deňimden,
Maňlaý sypan pamyk yaly öpüp, melhem elleriňden,
Ak arzuwyň, päk niýetiň meniň ýagty ertam eje.
Gurbanmämmet MEREDOW.
0
