Gargalar

GARGALAR

Asmanda çaknyşyp sowuk bulutlar,
Güýçli ýel syrygyp, gar köwsarlaýar.
Meň kalbymda bolsa uçgun tutaşyp,
Ýanyp duran küre ýaly lowlaýar.

Azaşýan ýol tapman doňak tokaýda,
Dodaklarym kepäp,
Ýalaýan gary.
Ýüregim gananok, ýene men teşne.
Gaýyp ýör depämde, gara gargalar,
Soraýan olardan:
- Nirede çeşme?!

Gargalar gygyrýar:
- Gak, gak-da, gak-gak.
Göwnüme bolmasa, diýýärler olar,
- Gözleme gyz, bu tokaýda çeşme ýok.
Onda men nätmeli,
Nirä gitmeli?!
Gargalar tokaýdan
Ugradyň meni.

Gargalar gygyrýar ýene-de - Gak - gak!
Belki diýýändirler:
- Ugratmarys, ýok.
Ah, bular göwnüme
Gury hyýaldyr.
Ol gargalar meni,
Görýänem däldir.

Sowuk ýel şuwlady,
Gargalaň sesi,
Bu uly tokaýda birhili tukat.
Küýsäp, dury çeşmäň sowuk suwyny,
Ýene meň kalbymda lowlaýar şol ot.

Daň agardy, ýatdy uly harasat,
Menem çykdym dury çeşmäň ýoluna.
Ýöne henizlerem ýatlap gynanýan -
Düşünemok gargalaryň diline.

Annasoltan KEKILOWA