Güýz

GÜÝZ

Ýaprak ýagýar boz topragyñ ýüzüne,
Ýagýar, öz ömrüniñ menzilin ölçäp.
Solan meñzi bilen öpýär Zemini,
Gaýgy-gussalaryn bir-bir çemçeläp.

Sergezdan ýel boýlap giden ummany,
Hyýalynda, arzuwynda gowuşýar.
Ýaprak bolsa meñzäp köýen arzuwa,
Buýsançly daragtyñ astyna düşýär.

Gara bulut aglap, derdin egisýär,
Gözýaş bilen ýuwup baglañ göwresin.
Çala pyşyrdaýan altynsow baglar
Söýgi bilen örtýär Zemin degresin.

Dolanjak hem dolanmajak güýz hakda
Oýa batýar tylla güýzüñ säheri.
Daragt bolsa düýşde töre geçirýär
Hoş owazly, päk arzuwly bahary.

Aýnäzik HOJAGULYÝEWA.