O dirilənədək

O dirilənədək

Axırıncı dəfə; - keçən il;
daha dəqiqi; - keçən ilin, payız fəslinin oktyabr ayında;
...ümidsiz, çarəsiz məmləkətimizə yağış yağmışdı...
elə; - göydəki buludların arasından qaçıb,
... canını qurtarmış yağış suları;
elə, birbaşa; - yerdəki qara torpağı bağrına basmışdı, ...qucaqlamışdı...

***
indi də yağır, o yağış
indi də payızdı,
indi də oktyabr ayıdır...
inan ki; - sevgilim...
indi də göydən yağan yağış, yerdəki qara torpağı
...qucaqlayır...

***

kim deyir ki; - Allah təkdir...
kim deyir ki; - Allah tənhalığı,
...təkliyi çox sevir...
kim deyə bilər ki; - sevgilim,
...sənin kimi məni də Allah yaradıb...
...heç kim...
...heç kim deyə bilməz...
axı, sən deyirdin ki; - məni, sən yaratmısan...
elə; - Allahın məni tərk etdiyi bir vaxtda,
sonsuz,
sonu olmayan,
əbədi bir yolda,
...ümmanda...
...həmin o yolda...
...ikimizin birgə addımladığı o yolda...
elə; - Allahın məndən üz döndərdiyi bir vaxtda...
elə; - sən, mənim əllərimdən tutub saxlamısan...
elə; - Allahın lənətinə tuş gəlməyim deyə,
... sən, məni bağrına basıb qucaqlamısan...

***
deyim, biləsən;
biləsən ki, segilim; - Allah kainatı özü də bilmədən yaratdı...
beləcə; - Allah kainatı yaradandan sonra,
...kainatı sevməyə başladı...
elə; - kainatı yaradandan sonra,
...əlavə nə yaratdısa, onu da sevgi ilə yaratdı...

***
qulaq as, segilim,
yenə təkrarlayıram;
kim deyir ki; - Allah təkdir...
kim deyir ki; - Allah tənhalığı,
...təkliyi çox sevir...
əksinə, - əslində;
Allah kainatı, Ona həyan duraq deyə, yaratdı...
...arada...
Onun qapısını döyək;
Ondan nəsə istəyək;
...deyə...
arzularımız,
diləklərimiz,
dualarımız qəbul olmayanda da,
Onun hüzurunda məzlum qul kimi,
lap sahibsiz it kimi,
diz çöküb yalvaraq deyə;
... kainatı yaratdı...

***
nə dəyişdi ki, heç nə...
bircə heç nə dəyişdi...
yenə, əvvəlki kimi
yenə, zaman təkrarlandı...
yenə,
Allah məni tərk elədi,
yenə, üstəlik;
sən də məni tərk elədin...

***
sevgilim, unutma;
bir gün ikimiz də dünyamızı dəyişəcəyik...
məzarda olmasa da,
mütləq,
ya o qara torpağın altında
ya da o biri dünyada
eynən,
bu dünyanın insanları kimi
bəlkə, iki yad insan kimi
bəlkə, iki doğma insan kimi
ümidim var, yenidən, qovuşacağıq...
...kim bilir?!...
bəlkə, o dünyada da;
yenə, mən;
yenə, Allahdan,
yenə, səndən
...ikinci dəfə ayrılacağıq...

***

sevgilim, səni deyə bilmərəm;
amma, mənim sonsuzadək; - qəbirdaşımdakı rəsmimdə
...gözlərim, əbədi yol çəkəcək...
...qulaqlarım, hardasa uzaq bir yerdən...
adicə,
tənhalığa alışmış yetim bir insanın səsini umacaq...
tənhalığa alışmış yetim bir insanın səsinə möhtac qalacaq...
elə; - rəsmimdəki özüm
elə; - ruh kimi,
elə; - sevgilim, sənin dəfn oluduğun qəbri axtaracaq...
inan;
ruhum sənin qəbrini tapmaq üçün,
... qəbirstanlıqlar dolaşacaq...

***
elə isə; - hələlik, o dünyada görüşənədək
inan; - səni gözləyəcəm, bu dünyada ölüb,
...o dünyada dirilənədək...

Nikbin QASIMLI.