"Ömür kelte horlandan ar alara..."

• Garantga

Sowulyp möwrüti symgylt iňrigiň,
Öňi uka giden çagy illeriň.
Ekin garawuly bir goja kişi,
Pişesi edinip çyn “syrly” işi,
Sarap, çatyp bir-birine agajy,
Özünden artany, köne-küşüli,
Geýdirdi tap-taýyn garantgasyna,
Buýsanç bilen, emaý bilen ýaşuly.

Dikdi orruk ortarasy mellegiň,
Gullugyň möhleti – eňňerä çenli.
Başlandy ilkinji güni gullugyň.
Goja garantgysyn garawullady,
Garantga ekini garawullady.
Gerk-gäbe gawun iýjek şagallar,
Gorkup, oňa garaý-garaý uwlady.

Gündiz garantgadan heder etmedik,
Guşlar saýasynda saýaladylar.
Garantga eýesniň was-was başyny,
Uzak ýyllar ýel-ýagmyrdan goraglan,
Garantga geýdirlen köne telpege,
Guş-gumrylar gonup, … zaýaladylar.
Görüp göz alnynda bihaýa işi,
Başyndan jüp aýlap, atyp sapany,
Garantga eýesi daşlady guşy.
Günortan ukusyn alýan mahaly,
Çagalaryň eli kesek tutany,
Daşlady garantgaň gaba başyny,
Agaç el-aýagyn, agaç döşüni.
Ukusy bozuldy, sögündi biçak,
Käýäp kowalady “bezzat goşuny”.

Mähnet dünýäň bir içgysgynç çetinde,
Garantgysy bilen höwrükdi goja.
Gündiz goraglady ýalňyz hemdemin.
Iňrik garalanda, gelende gije,
Garantga ekini garawullady.
Garantgaň başyny yrady şemal,
Garantgaň golunda galgap şuwlady.
Gündiz adamlardan gorkýan şagal,
Gije garantgydan gorkup uwlady.
Goja garantgysyn garawullady…

• Gürji

Ol gün gije ýary gelýärdim tenha,
Bir gürji topuldy çasly “jöw-jöwläp”.
Men yza dolandym, daşlaşdym kem-kem,
Gürji üýren ýerden ökje ogurlap.

Sebäp gürji üýrse eýmenýän juda,
Men söýemok bu it sypat bitleri.
Gürjüň özünden däl, sesinden gorkýan,
Gürjüler oýarýar läheň itleri.

• Özüme öwüt

Meni entetdiler, kän kemsitdiler,
It alan sanaja döndüm set sapar.
Suw içdim men itiň art aýagyndan,
Gülüşip diýdiler:
– It iti tapar.

Meni kän ýykdylar,
Zol-zol depdiler,
Ýandaklyga girdim urgudan gaça.
Düýe ýandak iýdi, men gülün iýdim,
Diýdiler:
– Çoçany tapdy ol çoça.

Meniň tenim dilim-dilim etdiler,
Ganymy tasadyp gaçdym dag taýa.
Girdim bir gowaga, yzdan diýdiler:
– Ýylan, gutly bolsun narpyz hemsaýa!

Meni it ýarmady, düýe depmedi,
Ýylan melhem berdi zähere derek.
…Ömür kelte horlandan ar alara,
Meger, olar bilen ýaraşmak gerek.

• SERWI

Kine etme, çapraz gelen ykbala,
Sen gitseň, aman bar, aman gez, Serwi!
Git, giden şekilli, dolma gubara,
Sen gitseň, aman bar, aman gez, Serwi!

Dag başyna çykmak asan, iýnmek kyn,
Ýyldyz bolsaň, ýana-ýana süýnmek kyn,
Kim bilipdir, ýanmak kynmy, sönmek kyn?—
Sen gitseň, aman bar, aman gez, Serwi!

Daňyň ýaňagyndan gözýaş syrygyp,
Şemal çawuş çaksa, zaryn sygyryp,
Ýatla, ýöne gezip ýörme sargaryp,
Sen gitseň, aman bar, aman gez, Serwi!

Boz bulanan siller akar, da:ş galar,
Bu düýşe meňzeş gün yzda, daş galar,
Bir gün… Göwün höwes eýläp Arş galar,
Sen gitseň, aman bar, aman gez, Serwi!

• ŞEMAL

Bilmedim, bu şemal ýa dul galypdyr,
Ýa hyýalbent sallah öýünden elkin?
Kä sygyryp, kä penjiräň kakyp dur,
Gaçyryp sabryny, ýitirip eňkin.

Bilmedim, ýa ýetim galypdyr şemal,
Ýa eziz ojakdan azaşan bala?!
Çüw ýalaňaç baga ýaplanyp şu hal,
Baý-baý, kän aglady, gözýaşa dola.

Bilmedim, ol garabagyr enemi,
Ýa ýary ýitiren keç ykbal gelin?!
Bir ah çekdi elendirip älemi,
Meger, jahan ýüzün çirkizdi ýalyn…

Bilmedim, ol hakmy göwnüne deglen,
Ýa mejnun telbemi akyly çaşan?!
Möňňürdi, eý, dünýä, daglan sen, daglan,
Aýnadan syrykdy, hol-ha, gözýaşam.

Ýürek lerzan bolup bu agyr hala,
Şemal zary galdy daş çyksam ýortup.
Düşünmedim bu ötegçi şemala,
Ýa düşünjek boldum bolşundan artyk?!

• GÜZER

At segredip, kä pyýada geçdigim,
Güzerim suw basyp, kenary ýitmiş.
Ýüregim “Ýüz” diýip, gop berýär şu hal,
Hyýalym “Bök” diýip, ýeňsämden itmiş.

Ýüzjek, bökjek boldum, boldum men heläk,
Boş azap, barybir bolmadym türgen.
Şu güzeri saklap galmaly boldum,
Ol kenardan birçak ugrandyr kerwen.