Saz etdigi zaman

SAZ ETDIGI ZAMAN

Gel-ä, söwdügim, gel-ä,
Gollaryñ boýnuma dola,
Saralaýyn inçe bile,
Bilbil saz etdigi zaman.

Geç, gözel, garşymda durma,
Ölýän, ganyma el urma,
Ýüzüñi menden öwürme,
Ýanyña ýetdigim zaman.

Ýoluñy aýyrma menden,
Köñül üzülermi senden?
Meger jan aýrylar tenden,
Senden daş gitdigim zaman.

Garajaoglan, il bilmese,
Ýanyñda päzgel bolmasa,
Üç gije saba bolmasa,
Dolaşyp ýatdygym zaman.

■ SAÇYÑ

Galk, söwdügim, geýin, guşan,
Topugyñy örter saçyñ.
Gaflat basmyş, uklamyş sen,
''Oýan!'' diýip, dürter saçyñ.

Galk, söwdügim, geýin, guşan,
Diýdiler söwdaña düşen,
Söýlesen-e dile düşün,
Ýüpekdendir tar-tar saçyñ.

Garajaoglan, dürs söýlär,
Nirä barsa waspyñ eýlär,
Bäş gulaçda karar eýlär,
Dört gulaçdan artar saçyñ.

■ BAL BOLMAZMY

Saña diýem, Bulgar gazy,
Sende özge il bolmazmy?
Sende ýazlaýan gözeliñ
Al ýañagy bal bolmazmy?

Bulgar dagy iki hatar
Gollarynda güller biter,
Bir ýar söýdüm, maña ýeter,
Iki söýen del bolmazmy?

Bulgar dagy para-para,
Kim al geýer, kimi gara,
Salam söýläñ näzli ýara,
Aýrylanlar il bolmazmy?

Ýol üstünde baýlar, hanlar,
Hany sorañ gonan janlar?
Söýüp-söýlüp aýrylanlar
Ýanyp-ýanyp kül bolmazmy?

Garajaoglan diýr maha,
Dünýä saña galmaz ah-a,
Seniñ kibi patyşaha
Meniñ kimin gul bolmazmy?

■ SÖÝMESEM SENI

Şol dergähden dönsün ýüzüm?
Ölinçäm söýmesem seni.
Gan aglasyn iki gözüm,
Ölinçäm söýmesem seni.

Myradymy aramaýyn,
Hakyñ didaryn görmäýin,
Gunça gülüni tirmäýin,
Ölinçäm söýmesem seni.

Bolsun, eý, soltanym, bolsun,
Her kişi etmişin bilsin,
Gözüme ganly ýaş dolsun,
Ölinçäm söýmesem seni.

Syrym äleme paş bolsun,
Bagrymda biten daş bolsun,
Gözlerim ganly ýaş bolsun,
Ölinçäm söýmesem seni.

Garajaoglan, öli ㅡ murda,
Sen düşürdiñ meni derde,
Mätäç bolaýyn namarda
Ölinçäm söýmesem seni.

■ PELEKDEN ÇEKDIM

Men bu gözellerden görmedim kemlik,
Her ne jepa çeksem, pelekden çekdim.
Huplar bilen ýokdur gaýry bir dawam,
Derdi hupdan däl-de melekden çekdim.

Ne boldy näzlime, bilebilmedim,
Ýar meni aglatdy, gülebilmedim,
Her bolar-bolmaza dileg salmadym,
Çoh şükür, dilimi dilegden çekdim.

Bir gizlinje hat göndermiş ýar maña,
Balyk kibi çümem gaýry ummana,
Berseler jahany, almanam saña,
Indi men elimi pelekden çekdim.

Garajaoglan diýer, janym awutdym,
Indi gözel sözlerini unutdym,
Yşk ataşyn degirmende üwetdim,
Galbirde elendim, elekden geçdim.

Hasan GARAJAOGLAN.