Söz biläni

SÖZ BILÄNI

Barmy kemally kemligiň
Wasp edere söz biläni?
Ol tassyk eder kimligiň,
Ömür ýolyň düz biläni.

Yňdarma ulus jemagat
Bolmaz ruhy salamat,
Akyl atly ýagşy alamat
Alys gider bez biläni.

Ýakasy gaýyşly bende
Haýbatly ädim ädende,
Göwre dur, göwun gezende,
Göz baglaýjy toz biläni.

Pully kişiler oýun eder,
Gar bile gazan gaýnadar,
Gözu-gaşyny oýnadar
Agtyk deňi gyz biläni.

Yzarlap mydam melaly,
Şondan taparlar ,, kemaly",
Depeläp geçer halaly,
Oňa goşup duz biläni.

"Öňe-öňe" diýer diller,
Ätdirmez gum basan ýollar,
Dürbä ilmedik menziller
Görünermi göz biläni?

Garaýolly diýer, orak
Haşal däl, hasyla gerek,
Bagytdyr: mukaddes çörek
Elden-ele gezmeläni.

Şyhymyrat ABDYLLAÝEW.