Barýardym ýaşyl ýol bilen, öwrülip ýaşyl baglara

***

Barýardym ýaşyl ýol bilen, öwrülip ýaşyl baglara,
Ýadymda meň çagalygym, ýaşlygym, ýaşyl ýaýlalar.

Parahat penjireleri ýaz ýagmyry pitiklände,
Bu birahat, giň şäherde iller ýatyp, it uklanda.

Dörüp çykdyk gatlaryny çelpek deý terjimehalyň,
Gök erik kibi gögele, terne deý terje mahalyn.

Akyl satdyk bir-birege her birimiz dana deýin,
Bilmedik şonda-da bize garaşýanyn nämeleriň.

Bir hyýalbaz oglanjykdym, ýokdy müýnüm, ýokdy derdim.
Uly ile belli şahyr bolmagy arzuw ederdim.

Poeziýaparaz oglandym, gijäň baş ujuny saklap,
Göwün ýüwürerdim täsin bir eser döretmek hakda.

Uçurardym hyýalymy asmana batbörek ýaly,
Hamala, diýersiň, şeýtmek meň üçin has gerek ýaly.

Dostlarmyň ýüregi ýuka, olar maňa dözmediler,
Aýtdy olar ýoklugymda diýäýjek hoş sözlerinem.

Ganatyn geren hyýalym belentlik awarasydy,
Keýpim ne ýagşy, ne ýaman, gülküdir agy arasydy.

Barýardym ýaşyl ýol bilen, öwrülip ýaşyl baglara…
Ýadymda meň çagalygym, ýaşlygym, ýaşyl ýaýlalar.

Gurbandurdy ORAZOW.