Bilbil mysaly biçäre

BILBIL MYSALY BIÇÄRE

Sen gyýylma ykbalyma, eje jan,
Dilgir-dilgir bakma meniň gijäme.
Gurban men bir kile nabada biten
Göwnüňe hem gubar tutan didäňe.

Hoşlaşmaly boldy harplygym bilen,
Şol günler hüwdiň deý oňatdy weli,
Dulugma doňduryp şarpygy bilen,
Durmuş çagalykdan oýatdy meni.

Gögüň ýyldyzlaryn soraýan günlem
Ýitdi galdy hol aňyrda öwrümden.
Indi soňsuz sowallarym ýok meniň
Hem gorkamok ertekileň döwünden.

Gorkýan ýüregimde galpyldy bolup,
Duýgyň köňle çökjek pajygasyndan.
Sowuk,
soluk,
ýowuz,
öt aýralygyň,
Bagtyň nämedigini ýatlatjagyndan.

Goý, men ýüregimi ýakaýyn, eje,
Menden soň-soňlaram oňa kän kişi
Göwnün goýsa, köňlün çoýsa, şahyryň
Şondan uly näme bagty barmyşyn?!

Täleýiň deý jaýryk-jaýryk hem gaty
Ýetirme mañlaýňa gamly aýaňy.
Eje, umytlarmyň sakçysy sen,
hem
Dünýäň meni söýen ýalňyz aýaly...

* * *

Özi çün däl, meniñ üçin,
Hakdan dilegi köp eden.
Howsalasy bilen maña
Gelýän dertleri dep eden.
Hemişe hemme ýerde
Keşbine suwsan enemdiñ.

Ýüregi dert, gözleri dört,
Ýollaryma bakyp galan.
Gaýgydan, gamdan, görgüden
Daña golaý ýatyp galan
Janserek-perwaz enemdiñ.

Göteren, guwanan, eklän,
Yrym edip, çirim etmân.
Bagtymyñ ýolunda beklän
Sen meniñ ryzwan enemdiñ.

Bilbil mysaly biçäre,
Gögerçin deý görmegeýim.
Owlagyñ - ogluñ ugrunda
Keýik kimin keýerjeklän,
Maral dek ylgan enemdiñ.

Galsam dünýâniñ tümünde,
Al şapak kibi lowurdan
Albaýym - elwan belendim.
Men- gam ýurdunda Ýusup jan,

Sen meniñ syrly hazynam,
Gaÿgysy pynhan enemdiñ.
Ýeketäk öz sesi bilen
Gürleýän ynsan enemdiñ.

Gurbandurdy ORAZOW.