Bu gün Lermontowyň ýaşyn ýaşadym

***

Bu gün Lermontowyň ýaşyn ýaşadym,
Ýöne adym ile ýaýjak sözüm ýok.
Islärdim men öz adymyň derwiş dek
Ýol söküp ýörmegin ýeriň ýüzünde.

Ýöne bir gün gamdan aýylyp essim,
Täleýiň tabyt deý sowuk agşamy.
Belaň doňan ýaňagyndan ogşadym,
Soň Peçorin bilen agladym sessiz.

Hoş sözlere mätäç, göribe garşy,
Men kimiň hasrata dözmez ezizi.
Durmuş – öweý ene, dadyrdy şarpyk,
Ölüm ýagyrnymda goýdy el yzyn.

Yşkyň huzurynda ölüp-direldim,
Gül gyzyň gaşynda özelenipler.
Söýgi öňküsinden bir gez beýgeldi,
Her hal il deňinde sarpaly boldum.

Hernä gülkim agy bolmady ile,
Hernä agym ile gülki bolmady.
…Ah, Pyragy, meni nä günde goýduň.
Sözi söýen seni ýere dözermi?!
Men seni jigermiň ýagynda goýdum.

Müň agladym bir gülkiniň şanyna,
Kä soldum utmadyk lotereýa deý,
(Adam iňriklerde iňkise gider,
Ýüregi etden oň batar oýa-da).

Dostlar, haýyş sizden, göwnüme degmäň,
Diýmäň siz gögele başyň ýaş eken.
Ak gara bürendi 2-nji fewral,
Bu gün Lermontowyň ýaşyn ýaşadym.

***

Gögeledim, sataşdyň,
Sen-sen dünýäň manysy,
Yzlaý-yzlaý ýadaýyp
Seni saçyp bilmedim,
Ummanlarda çat açdy
Çökdi yşkyň gämisi,
Hoş gal, wysal adasy,
Seni açyp bilmedim.

Gurbandurdy ORAZOW