EL ÇARPYLMAÝAN GOŞGULAR
Şahyr goşgusyny okap başlady,
Märekede hyşy-wyşy kesildi.
Jümşüldäp ugrady kebzeleñ gözi
Içlere oklandy otly kesindi.
Sähetli gün dünýä inen setirler
Topragynyñ halal duzun haklady.
Uruş ýyllary deý agyrdy olar,
Namysjañdy, gerdenleri ýüklüdi.
Şahyr bogazyna agram salmaýar.
Eller galgap, gerjeşmeýär gaşlary.
Gaýratly. Wepaly. Sada. Düşnükli.
Derýalar dek içindedi joşlary!
Elýeterde, ynha dür bolup ýatyr
Gol uzatsañ, ne ýetdirýär, tutdurýar.
Gitdigiçe artyp barýar gyzgyny ~
Ine, şeýdip, içiñde gorp atdyrýar.
Otyrsyñ, gürrüñiñ özüñe ýetik
Şygyr dertli gyýlar, birden nur ýagdyr.
Diri ýiten atañ ýanyna elter ~
Tümmegi gujaklap, aglarsyñ ýalñyz.
Adammy sen ýa-da bir tokga daşmy,
Doñup oturansyñ ~ göz gyrpylmaýar.
Eý, Hudaý, şeýle bir şygyrlar bolýar ~
Aglap diñlenilýär, el çarpylmaýar...
Baýram JÜTDIÝEW.
