Enäniñ sesi

ENÄNIŇ SESI

Säher turup ele galam alamda,
Sesiň gelýär: «Ölçerdiňmi, han ogul?..»
Goşgymy tamamlap, hoşal bolamda,
Sesiň gelýär: «Ölçerdiňmi, han ogul?..»

Käte çar ýanyma gaharly garap,
Gelnimden, çagamdan gezsem yrsarap,
Goh turuzsam, buz üstünde toz arap,
Sesiň gelýä: «Ölçerdiňmi, han ogul?..»

Awa çykyp, bukulyp bir ýylgyna,
Gözüm diksem bir biçäre sülgüne
Ýa bir kişiň degjek bolsam göwnüne,
Sesiň gelýär: «Ölçerdiňmi, han ogul?..»

Käte-de buýsanyp ýönekeý zada,
Gomparyp, özgäni salmasam ýada,
Özümi iň güýçli saýsam dünýäde,
Sesiň gelýär: «Ölçerdiňmi, han ogul?..»

Bir çaka barsa-da ömrümiň saly,
Mydam küýsäp gezýärin şol sowaly.
Meni müň beladan goraryň ýaly
Sesiň gelsin: «Ölçerdiňmi, han ogul?..»

Italmaz NURYÝEW.