GÖWNÜM ŞOL ÝERLERE TELWAS EÝLEÝÄR...
Göwnüm şol ýerlere telwas eýleýär,
Şatuduň ýanyna, ýanyňa seniň.
Kän ýigitleň ýetilmedik arzuwyn,
Bir ýigidiň bagtyn jemlän bedeniň.
Göwnüm şol ýerlere telwas eýleýär,
Tutly akar ýabyň gaýrasyndaky
Gök öwsüp oturan maýsaň içinde
Seň bilen, seň bilen galmaga baky.
Göwnüm şol günlere telwas eýleýär,
Sabyr meýin gana-gana tükedip,
Ýük edip egne däl, tylla saçlarňa
Gülleň ysyn getirerňe kükedip.
Göwnüm şol günlere telwas eýleýär,
Ak ýagyşa ezilmäge süllümmaý,
Tolgunýan bir geňsi pursatlaryňa,
Gözi nerkes, ýaňaklary gülgün ýar.
Meniň şol günlere gidesim gelýär,
Bilýän şonda ýeňlejegin bu derdiň.
Seni şol ýerlerden tapjagmy bilsem,
Men häzir giderdim, näler giderdim.
Gurbandurdy ORAZOW.