Gurbannazar Ezizowyň ejesine

***

Gurbannazar Ezizowyň ejesine

– Dagmy sen?
– Nala tartyp, sarsyp, ýarsyp hem ersip,
“Günbe-günden derdim artyp”¹
Ýaňlarymy-gamlarymy,
Jahan içre ýaýradyp,
Gözýaşymy daşlam kibi paýradyp,
Götermezdim dag adyn.
Ýagyş-gara pagyş-para bolmadyk
Synam mäjum-mäjum bolup dagardy.

Derýamy sen?
Perýadyma,
akyp bilmän peýwagtyna,
Bozlaýyp:
«Balam, badalgam, bagtym eý!».

Daraw-daraw dertden däliräp, düwläp,
Hanamy ýat edip, kenarym düzläp,
Bugaryp,
gugaryp,
guraýyp
galardym men.

Çynarmy sen?
Çydarmy heý,
Ah, çydamak nirede?
«Ýapraklaryn gözýaş kibi düşürip»²
Terligim gam kibi tutup şireje,
Gider gaýratym-da, ýiter hüşügim.

– Dag däl, derýa däl, çynar däl,
Ýermi, Asman näme onda?!
– Ölümem bagt bolup görnen,
Ýalňyz şahyr balasynyň
Ýerine ýatlama berlen
Ýalňyz ene özüň bolma.

————————
¹Magtymgulydan
² Atamyrat Atabaýewden

Gurbandurdy ORAZOW.