Hindi kinosy

HINDI KINOSY

Köpden bäri hindi kinolaryna
Bagyşlasam diýýän birje şygrymy.
Henizem ýadymda oglankam görlen
"Baju-Bawra",
"Jenap-420".

"Hindi kinolaryn köpräk getiriñ!"
Ýalbarardyk kinoçymyz Aryba.
Ýolda-yzda hiñlenerdik ses goşup:
"Men barýaryn Bombeýe,
Iş tapylmaz meñ ýala,
Tapylmasa nädeýin
Özüm ýaly garyba!"

Etrabyñ çägine hindi kinosy
geläýdigi eşidilerdi şo bada.
Kartma-kart gatnadyp,
Hökman şol gije
Görerdiler ony üç-dört obada.

Ol döwürde jeññellikdi töerek
Obalañ arasy yrakdy-yrak.
Kino kartlaryny gatnadýan adam
Görnerdi gözmüze Göroglyçarak.

Aýallar-a aglap için egserdi,
Bozulardy hatda käbir erkekler...
...Hindi kinosy bar sesin eşitsem,
Aglanym ýatlaýan menem entekler:

Jahyllyk döwrümdi. Görüp "Sangamy"
Saklanyp bilmändim, dostlam gülşüpdi.
Añansoñlar meniñ yşkdan ýanýanym,
Neçüýn aglanyma olar düşüpdi.

Hindi kinosyndan şu setirleri
Umyt bilen gowşurypdym bir gyza:
"Meñ söýgime dagam erär,
Meñ söýgime daşam erär.
Irde-giçde señ kalbyñda
Maña bolan söýgi dörär!"
Hut guýa gaçana dönüpdi hatym,
Ýagşy-ýaman jogap almandym yza.

...Hol gün gördüm ýene hindi kinosyn,
Kinoñ ady başga,
Waka ozalky:
Ezýän hem ezilýän,
Söýgi, aýralyk,
Ýanbermez aklawjy
Goldaýan halky.

Nämüçindir indi öñküler ýaly,
Aglasym gelenok, awanok bagrym.
Belki, duýgularym kütelişendir...
...Garaz, ýazdym niýet edinen şygrym...

Hemra ŞIROW.