Inilerime sargyt

INILERIME SARGYT

Murtyňyz tabapdyr ýaňja, inilem,
Kämil çykyp, ulus-ile goşulyň.
Basym siňer ýalňyz damja, inilem,
Däli derýalara, sile goşulyň.

Her biriňiz gözel beýdi gazalyň,
Ezel bilen aýlaň basyn gözeliň,
Karz almaň, jepa çekip gazanyň,
Şat durmuşa güle-güle goşulyň.

Zähmet çekiň, irmän, arman, ýorulman,
Üstünlikde baş aýlaman, ýoýulman,
Aýdym aýdyň, söýüň, göreşiň, ylgaň
Ýoda bilen gidip, ýola goşulyň.

Wyždan size Taňry beren gymmatdyr,
Danalara uýan bolar hümmetli,
Ýüz öwürmäň senalardan, ymmatdan,
Beýik hikmetlere, dine goşulyň.

Gyşda şugla saçyň, yssyda – salkyn,
Gaýgy-gussaňyzy şemallar alsyn,
Sizi gören edep, kemallar alsyn,
Görüme-göreldä, syna goşulyň.

Nusga alyň sähralardan, daglardan,
Miwesi köp, başy aşak baglardan,
Gaça duruň gargalardan, zaglardan,
Perwaz urýan şat bilbile goşulyň.

Az sözläň, giç ýatyň, saba oýanyň,
Herki işde bir-birege daýanyň,
Myrady wysal bor ilin söýeniň,
Toýa, ýasa il-gün bile goşulyň.

Gulak goýuň, ýürek goýuň sazlara,
Gyş gyşlaň, guş guşlaň çykyp awlaga,
Bendi bolup bakyň ýaşyl ýazlara,
Sergin sähralara, gola goşulyň.

Diýsem ýene iki tärin gowlugyň,
Nirde bolsaňyzam öýe howlugyň,
Ýagşylyga bagyş eýläň dowmuňyz,
Ýagşy käre, ýagşy päle goşulyň.

Baharlara, akarlara guwanyň,
Öz boýuňyz boýun alyp ulalyň,
Kyn günde hatyrjem, baryň jem boluň,
Halal ojagňyza, dula goşulyň.

Gurbandurdy ORAZOW