Ömrümiñ manysy

ÖMRÜMIÑ MANYSY

Kalby ýylatjak ot uçgundan dörär,
Mert dek serden geçmek göçgünden dörär.
Ak kagyza şygyr bolup seçilen
Setirler Diýara yşkymdan dörär.

Durnalara hatar pozmak aýypmyş,
Maňa sen hakynda ýazmazlyk aýyp.
Kalba ak niýetin goýup gider gyş,
Men saňa şygrymy goýmasam, haýyp.

Kalbyň şahasyndan asylan gussam
Mymyk şemal bilen düşer, täner-de.
Seniň toprak diýen iň beýik ussaň
Howa derek howam bolýar kä ýerde.

Sözlere sygmadyk ýürek sedasy
Seslenere orun tapar didämden.
Nepesim Watanyň bolsun pidasy.
Ykbalymy yhlasymdan idärmen.

Üç kerem ömrüme manydyr, many:
Umydym, arzuwym hemem ynamym.
Setirlem Diýaryň bolsun gurbany.
Ýogsam ýere duwlanýançam dymaryn.

HatyJa HAJYÝEWA.