Sen dünýäniň dowamaty

SEN DÜNÝÄNIŇ DOWAMATY

Sen şeýle owadan, şeýle ajaýyp,
Hem şeýle mähirli, şeýle mylaýym.
Köp sataşan kynçylyklaram güýjiň
Kemmän eken.
Kemmäwersin ylaýym!

Ýüregňi däl ýüreklerňi göterýär,
Ýyllaryň synagna döz gelen kalbyň.
Dünýäň ähli derdin atyp gerdene,
Hiç zat bolmadyk deý aýaga galdyň...

Sen derýa deý joşly, dag ýaly belent,
Ümmülmez ýüregiň sähra ýaly giň.
Nädereje beýikdigiň aýdara,
Mukaddes sözi-de ejizdir mümkin.

Şonuň üçin söz ýok Watandan başga
Deňär ýaly mukaddeslik ölçegiň.
Ene!
Sen bu dünýäň dowamatysyň,
Gözbaşy sendendir ýagty geljegiň.

• EGER OŇA SATAŞAÝSAŇ...

Eger oňa sataşaýsaň:
Derrew paýawlap gara gyş,
Alkymlar-da ýaşyl ýazlar,
Peýda bor ýüzde ýylgyryş.

Dag gerşinde biten güli,
Tapan ýaly begenersiň.
Garşydaşyň oklan topun,
Gapan ýaly begenersiň.

Her dogan Güne şatlygyň
Paýlar ýörersiň pişme deý.
Elleriňde yzy galar
Iňňäniň tahýa keşdeleý...

Kä kişä has ir sataşýar,
Käteler-de sataşýar giç.
Ýöne başa düşse hökman,
Be:r adatdan daşary güýç.

Sebäbini bilmersiň, hiç,
Gözüňe uky gelmeýär.
Onsoň gündelik aladaň,
Artaýmasa kemelmeýär.

Birinji hem soňky gezek,
Ykbal çynlakaý iş salşyp:
Gursakda urunan kalbyň,
Beýniň bilen pikir alşyp:

Alkymlar-da ýaşyl ýazlar,
Derrew paýawlar gara gyş.
Çünki söýgä sataşaňda
Üýtgeýär dünýägaraýyş.

• HAKYKAT

Gözel güller bilen keşdeli ýaşyl,
dony goňur köýnek üste geýipler,
Sähram gujak açdy ajap bahara,
Ýazym geldi gitmek istemeýipler.

Çeşmelere aýdym berip yşkyndan,
Ýaz mäkäm ornaşdy türkmen düzüne.
Okalmadyk şygyr bolup ýazyldy —
Kagyza däl, ýürekleriň ýüzüne.

Özüne meňzeş ýürekleň ýurdunda
Şeýdip bahar ömürbaky düşledi.
Ykbalyň hiç zada eli degmänsoň,
Gussa batmak hiç ýadyna düşmedi...

• BU ÝYLLAR

Ýady ýakyn, dogan eder ülpeti,
Durşy bilen mähre baýdyr bu ýyllar.
Gujagynda ýokdur asyl külpeti,
Şat günleri onki aýdyr bu ýyllar.

Olara aýnada görýän deý aýan,
Ýürek syryň etmeseň-de sen beýan,
Päli düzüw däle berenok peýan,
Danalar deý pähme baýdyr bu ýyllar.

Ylham alar, joşgun alar Hazardan,
Arpa, bugdaý ýükin ýeti:r harazdan
Baryn bazar eýlän myhmanparazdyr —
Binýady berk gurlan jaýdyr bu ýyllar.

Bu durmuşda gezme, göwnüm-gylyksyz,
Ýüregiň mährini ile ýaýyp dur.
Diýip bolmaz hiç birine gyzyksyz,
Ynsanyýeti bagtly saýdy:r bu ýyllar.

• MEN KITABY AÇDYM...

Men kitaby açdym,
A ol ýüregmi,
Soň nikaby gaçdy syrly dünýäniň.
Men şygra bar zatdan beter höwrügip,
Özgerenin duýmadym-la dünýämiň.

Öň-öňler ak kagyz bilen galam-a,
Buýrugym bitirji esgerimdiler.
Öwrüldiler alyp bilmez galama,
Duýgulamdan toplap leşger indi men —

Atly goşun bilen ýöriş edýärin,
Galanyň töründe ornamak isläp.
Gujaklaýan Pegasymyň boýnundan,
Bat alyp çarpaýa galanda kişňäp..

Käte tanyş söze uzap ellerim,
Hiç duýamok gaýtalanmy özümi.
Şonda ýakyn ýardamçydyr ezberim —
Ýagny ýalnyň kagyz ýakma dözümi.

Gijeler öň açan «açyşym» hakda
ýazyp,
ony otlamaly gündizem.
«Neçüýn şol bir setir gaýtalanyp dur?!»
Bu sowala jogabym ýok şindizem.

Galam ýöräp, jahan düşdi yzyna,
Öňi-soňy Ýer şar üçin geregem
şoldy welin,
Amyderýaň gyzynam
Öwürdi-le jahana janserege...

Men şygra bar zatdan beter höwrügip,
Özgerenin duýmadym-la dünýämiň.
Men kitaby açdym.
A ol ýüregmi,
Soň nikaby gaçdy syrly dünýäniň.

* * *

«Zyýany ýok duman örtse daglary,
Kalbyňa çökmesin hasratdan duman».
Gam-gussany getiräýme golaýňa,
Bu hakynda pikir etme umuman.

Düýşüňde arzuwňy göreriň ýaly,
Herne ýassygyňy goýmagyn bijaý.
Säher çagy rysgal paýlanýarmyşyn,
Ondan ýeke günem galmagyn bipaý.

Dünýäni görkezýän penjiräňi aç,
Goý, öýüňiz dolup saba ýelinden,
Arzuwlaryň alys wysallaryna,
Alyp gitsin tutup seniň eliňden.

Goý, hemişe gursagyňy ýagtyltsyn,
Günden ýüregiňe gönderlen çyraz.
Dünýäde iň agras adam bolsaň-da,
Çaga gülüp baksa, ýylgyrsy:n biraz.

«Ýer» öňünden «Ene» sözi agzalýar,
Kalbyňda enäniň tutýan ýeriçe,
Hormat goýup bu mukaddes Zemine,
Zeleliň ýetirme guşuň periçe.

Hemişe daglaryň başlary belent,
Gözýaşlary derýa bolup aksa-da.
Unutma uguňy ýekelän umyt,
Arzuwlarňy alyp gider maksada...

«Zyýany ýok duman örtse daglary,
Kalbyňa çökmesin hasratdan duman»
Sebäbi bagt halamaýar hasraty,
Senem bagtly bolaýmaly bigüman.

* * *

Togalak Aý dogup gelýär,
Başyny göterip ýerden.
Gözüm ýaşa dolup gelýär,
Süpürip bolýaryn «merdem»

Ýolumdan sowlan ýyldyzlar
Bir-birine çaknyşanda,
Özüm ýitirip, aýňaldym,
Gözüm gözňe kaklyşanda.

Kirpikmenim kirpikleriň
Sanjylyplar nazaryma,
Kalbyňdan ylham alyplar —
Dynman goşgy ýazaryma.

Ganatlarym ýasap ýelden,
Geldim dergähiňe ýene.
Aýasna gataňsy elleň,
Bak-da, ak pata ber enem!

• ÝAŞ ÄLEM

Men bir täze Älem açdym kalbymda,
Ol ylham hem ruhy güýç berýän eken,
Ak reňkli ullakan ganatlaryny
Kime-hä ir, kime giç gerýän eken.

Ol päkligiň nyşanyna öwrülip,
Bor eken iň uly daýanç nokadyň.
Men bu hakda öň-öňlerem kän gezek
Şekspirdir Gýoteden okadym.

Ýolagçyň bagtyna barýan menzilde,
Sabyrsyz garaşýan wysal iň şirin —
Şol Älemmiş.
Haýyş ýüreklerňizi,
Şol menzile ýetmek üçin diňşiriň!

Çünki ol menzilde ýylgyrýar arzuw,
Gussa bolsa gözýaş dökýär ýadaman.
Şol Älemi açan günüm düşündim:
Ol iň gerekli zat ähli adama...

Men söýgi älemin açdym kalbymda,
Ýürek atly ýüzügme ol gaş eken.
Ýer şar bilen des-deň döränem bolsa,
Maňlaýyna gasyn düşmez ýaş eken.

• BOLÝAR

Seň üçin açylan gül men,
Başgasyn tirmeseň bolýar.
Bir men diýp saýran bilbil sen,
Kapasa girmeseň bolýar.

«Parhy ýok, çal mukam-heňmi,
Bagtlydyryn bolsam senli»
diýdiň.
Herne soňam menli,
Ýatlamaň düýrmesem bolýar.

Dert, beladan üzülmedik,
Ýüregim — suw ýüzülmedik.
Men söýseňem düzelmedik,
Gam kölün syrmasaň bolýar.

Ýörelmedik ýodadyryn,
Açylmadyk adadyryn,
Senden beter sadadyryn,
Soň menden irmeseň bolýar.

Sülgün BAZAROWA.