Главная » 2021 » Mart » 19 » Ýaşlyk ýüzüp gitdi balyk mysaly
21:26

Ýaşlyk ýüzüp gitdi balyk mysaly

ÝAŞLYK ÝÜZÜP GITDI BALYK MYSALY

Ömrüň tirkeşipjik giden göçlerin,
Gaýtarmak isleýän hyýalda käşkä.
Bu seýreklän hem çalaran saçlaryň,
Öňler agyn sanan bolardyk ýaşkak.
Indi garasyny sanaýmalyja.
Gussa naýzasyny sünjip çalaja,
Ýüregiň törüne gözleýär ýoly.
Ýaşlykdan dartylyp gaýdan alaja
Ýüpüň,ýyl geçdikçe inçelip bili,
Ynha-ynha üzülerli görünýär.
Bir ujunda ýaşlyk balyk mysaly,
Sypjak bolup eýläk-beýläk urunýar.
Men bolsa emelsiz balykçy ýaly,
Kenara çykarmaň tapman ugruny,
Töweregme garap haraý gözleýän.
Dözmän ol balygyň düşen jebrine,
Dartylan ýüplügi biraz çözleýän.
Degme ýüzübersin ýüplükden sypman,
Hakyda ummannyň giňişliginde.
Men gideýin gojalyga howlukman,
Ol hem galybersin şol ýaşlygynda.
Käte ol ummanyň kenarna baryp,
Hyýalymda seniň keşbiň görerin,
Şonda men kalbymyň perdesin syryp,
Sen hakda şygyrlar aýdyp bererin.
Sen gidersiň ýene ummana çümüp,
Şol elýetmez tylla balyk mysaly.
Men bolsa kenarda galaryn dymyp,
Çeňňegi üzülen balykçy ýaly.

Azat NURGELDIÝEW.
Категория: Goşgular | Просмотров: 373 | Добавил: Azat_Nurgeldi | Теги: Azat Nurgeldiýew | Рейтинг: 4.0/1
Awtoryň başga makalalary

Goşgular bölümiň başga makalalary

√ Ak buýnuzly ak maral / Goşgular - 01.01.2024
√ Ýogaldy / Goşgular - 05.05.2024
√ Şemally gün / Goşgular - 27.01.2024
√ Meniñ monologym / Goşgular - 01.01.2024
√ Hasap / Goşgular - 18.02.2024
√ Жизнь / Goşgular - 29.02.2024
√ Nädip ýaşamaly?! / Goşgular - 13.01.2024
√ Wiswisi lakamly obadaşymyň ömür beýany / Goşgular - 25.03.2024
√ «Превратила всё в шутку сначала…» / Goşgular - 29.02.2024
√ Ýagyş damjasy / Goşgular - 24.03.2024

Teswirleriň ählisi: 15
0
1 Revo  
484
Öňler agyn sanan bolardyk ýaşkak.

Ikisem öten zamany aňlatýar dälmi?! (Gödegiräk okaldy, ikiden-biri artykmaç ýaly)

Goşgynyň özi oňat. Oňat pikir ýüwürtmeler, akgynly okalyşy... (men - diňe okaýjy hökmünde öz pikiri beýan etýändirin.)

0
3 mango  
651
öňler, çagakak.....
öňler, okuwçykak....
öňler, ýaşkak...
iki öten zamanyň biri yza äkidýär, beýlekisem konkretleşdirýär.

1
2 Edebiyatcy  
15
Azat aga, sizi görenime begendim.
Goşgyňy haladym, höwri köp bolsun

0
15 Azat_Nurgeldi  
283
Salam, menem şat. Indi nesip bolsa, habarlaşar durarys.

0
4 mango  
651
Azat kaka.
erbedem däl, diňlemezçe (okamazça) däl.
ýaşlygy barha inçelip üzülere gelen ýüpüň ujundaky balyga meňzetmäň, özüňem eli çeňňekli balykçy ýaly bolmaň... gyzyksyz däl.
ýöne, şol "Ýaşlykdan dartylyp gaýdan alaja Ýüpüň,ýyl geçdikçe inçelip bili,
Ynha-ynha üzülerli görünmeginden" soň menä jemlemede şol ýüpü üzerdim.
"Men bolsa kenarda galaryn dymyp, Çeňňegi üzülen balykçy ýaly" däl-de "Men – çeňňegi üzülen balykçy. otyryn kenarda ýüzümi sallap" diýen ýalyrak jemlärdim.
üzülmejek zat ýok. biraz realist bolmaly. üzülsün ýüp, ýitsin gitsin balyk.
(ol "gojalyga howlukman barýan" balykça альцгеймер keselem ýolugym biler. :-) )

0
5 Azat_Nurgeldi  
283
:-)

0
6 mango  
651
"Men gideýin gojalyga howlukman",
--
şu ýerde beýleki goşgyňyzdaky "pellehana howlukman barýan" atyňyz ýada düşdi.
ýüregiňizde hopukma barmy? rahatlyk islegiňiz gaty güýçli ýaly. :-)

0
8 Azat_Nurgeldi  
283
Goýber meni geçmiş,geljegme sary.
Tutan maksatlarmy amal edeýin.
Üzülende ömrüň inçelen tary,
Gözlermi parahat ýumup gideýin.

0
10 mango  
651
goşgy sizki bolsa, ine-de gaýtalama: "Üzülende ömrüň inçelen tary,"
bu tar şol альцгеймер-li balykçyň tarymy. :-)

0
9 Azat_Nurgeldi  
283
Dünýä gelip, gözüm açyp,
Gidenimde ýumup gitsem.
Bu panydan baka göçüp,
Şonda bir arkaýyn ýatsam.

0
12 mango  
651
Bu panydan baka göçüp,
Şonda bir arkaýyn ýatsam.
---
Azat däde. baky ýatylýan mekan däl. :-)
gabyr - ýatylýan ýer (o taýdada временный прописка-ly bolanyň üçin köp ýatylmaz.

0
14 Azat_Nurgeldi  
283
Beh, ol ýerde-de dynç alyp boljakdäl-ow onda :-)
Şonda bir arkaýyn ýatyp ukymy alaryn diýip ýördüm welin, onda men howlukmaýyn :-)

0
11 Azat_Nurgeldi  
283
Dünýäm, sen her näçe bolsaňda zalym,
Seniñbilen galmak, meniň hyýalym,
Amal etmän meniñ soňky wysalym,
Ýüz öwürip kese bakan sen dälmi?

0
7 mango  
651
Ömrüň tirkeşipjik giden göçlerin,
Gaýtarmak isleýän hyýalda käşkä.
Bu seýreklän hem çalaran saçlaryň,
Öňler agyn sanan bolardyk ýaşkak.
Indi garasyny sanaýmalyja.
---
"käşkä" nadogry otyr. "käşkä-käşgä" boljak bolsa "gaýtaryp bolsady hyýalda käşgä" bolmaly ýaly.
---
"tirkeşipjik" bilen "sanaýmalyja" – has eýjejik, naýynjar görünýär. göwnüme bolmasa birhili женственный.

0
13 Azat_Nurgeldi  
283
Bellikleriňizi geljekde göz öňünde tutaryn, nesip bolsa. Minnetdar.

Teswiri diňe saýta agza bolan ulanjylar goşup bilýär.
[ Agza bol | Saýta gir ]