Ýaşyl maýsalar / goşgular

WATANA

Keremli daglaryň ýüzüni ýalap,
Seriňi durlaýar mymyjak yeller.
Säher şemalyna başlaryn yrap,
Enaýy ýylgyrýar pagtaly peller.

Söýmelisiň, ýatlap her dem Watanňy,
Daban ýeri, degre-daşy ajaýyp.
Suwy, çöpi jana melhem Watanyň,
Sil getiren harsaň daşy ajaýyp.

Ot-çöpleriň arasynda gizlenen
Guş-gumrulaň çybşyldysy ajaýyp.
Tolkun atýan mahmal ýaly maýsanyň,
Säherdäki ygşyldysy ajaýyp.

Dört pasylda şahyr göwün tebigat,
Ol şeýle bir täsin ünsüň sowardan.
Sary ýüpek ýaly tylla bugdaýym,
Seni kalbyň söýgüsinden suwardym.

Dünýämize mahsus ýagşylyklara,
Şärikligme şükür, diýseň bagtyýar.
Elmydama waspyň ýaýyp ýaşaryn,
Şeýle bagta berseň bolýar ygtyýar.

■ TOPRAGYM

Nirä gitsem, mydam köňül küýsegim,
Mukaddessiň, jigerde jan, topragym!
Waspyňa söz ýetmez, näçe söýsegem,
Gül goýnunda ömür eglän, topragym!

Ak gar bilen basyrlypdyr arkasy,
Heňňamlar aýlanar, ýitmez sarpasy,
Ynsanyň bar genji, altyn halkasy,
Güllere beslenen degräň, topragym!

Ýatladyp tamdyrdan çykan ak nany,
Säher bilen bugaryşyň enaýy,
Kükregime sorsam ajap howaňy,
Dertlesem, derdime derman, topragym!

Hyýal etsem syýahata-ýörişe,
Togabym sen, badalgam sen her işe,
Gujagyňda nesip etsin hemişe,
Baky soňlanmajak döwran, topragym!

■ ENÄNIŇ ARZUWY

Hoş geldiň jägildäp, ýagty ýalança,
Gözümiň guwanjy, gül ýaly, balam!
Kalbymda gül açdy müň dürli gunça,
Göwnümiň begenji, bal ýaly, balam!

Hergiz, gül ömrüňde bolmasyn hata,
Erenlerdir pirler bersin ak pata,
Guwansyn oýnuňa eneňdir ataň,
Dünýämiň genji sen bal ýaly, balam!

Mynasyp bol arzuwlanan adyňa,
Aýak bassaň, gözüm düşsün badyňa,
Mydam mähriban bol ýakyn-ýadyňa,
Ýüregimde goýma armany, balam!

Saňa Hakdan saglyk, döwlet diläýin,
Ýanýoldaşyň duşsun mährem, mylaýym,
Abraýyňa şärik etsin ylaýym,
Küýsetmesin özge döwrany, balam!

■ BAHAR GELENDE

Gün nuruna öwşün atar topragym,
Göwünler galkynar, bahar gelende.
Baglar bogun ýaryp, ýazar ýapragyn,
Zemin ýalkym salar, bahar gelende.

Gökde garry mama depregin kakar,
Höwrün gözläp, gelinkömelek çykar,
Şowlulyk ýüzüňe ýylgyryp bakar,
Joşan göwün güler, bahar gelende.

Günbe-günden süýjär guşlaryň sesi,
Ynsanyň ýaşaýşa artar höwesi,
Seriňi sämedip, gülleriň ysy,
Keýpiňe keýp gatar, bahar gelende.

Daň şapagy iş üstünde görüler,
Ekiş başlar, boz topragym sürüler,
Ýagyn ýagsa, nur diýp baha beriler,
Toýlaň sany artar, bahar gelende.

Ýazlaga çykarlar hüýr-u-periler,
Ýaşyl geýip, gök öwsende dereler,
Ýagyş çisňäp, älemgoşar görüner,
Göwün daga tartar, bahar gelende.

Bezär-beslär, ýazar ajap halysyn,
Sen bahara ruhuň bilen baglysyň,
Göýä dünýä baky gelen ýalysyň,
Depäň göge ýeter bahar gelende.

■ ÝAŞYL MAÝSALAR

Ýaşyl reňkiň döwlet Tuguma kybap,
Saňa hyzmat etmek, uçursyz sogap,
Säher ygşyldyňa kylaýyn togap,
Owazyňa maýyl, ýaşyl maýsalar.

Gelinleň geýdigi mahmal ýalymy,
Ýa dünýäni örten ýüpek halymy,
Ynsanyň baýlygy, hany-manymy,
Zeminiň keşdesi ýaşyl maýsalar.

■ ŞYGRYÝET BOSSANY

Jenneti lukmanyň wekili bolup,
Daýhanyň siňdiren zehini bolup,
Rysgal-berekediň kepili bolup,
Ýetişer behişdi ýaşyl maýsalar.

Sizsiňiz sebäbi galkan göwnümiň,
Waspyn edýäň bu ajaýyp döwrümiň,
Melhemi siz çuň manyly ömrümiň,
Ýaşaýyş çeşmesi ýaşyl maýsalar.

■ BILMERSIŇ

Heniz il örmänkä, meýdanda ýörüp,
Çigrekli şemala kükregňi gerip,
Altmyşy hol beýläk oklap goýberip,
«Heniz-ä men ýigit» diýmän bilmersiň.

Yagşy niýet sowarmyş müň belany,
Ýadymda zenany tuga deňäniň,
Görseň ak saç bir nurana enäni,
Görşüp, oňa hormat goýman bilmersiň.

Ner ýükün ner çeker, çekmez kärderi,
Ýegşermän, dik tutgul merdem gerdeni,
Namart, heý, bir kişä wepa berdimi?!
Derdinden bagryňy gyýman bilmersiň.

Gözelligi duýmaz her telpek geýen,
Ömrüňden gädermiş bir köňül gyýan,
Uzak ýaşaýandyr durmuşy söýen,
Sen gözel dünýäni söýmän bilmersiň.

Günbe-günden bolsun zyýada — ömrüň,
Ruhuň belent bolsun, galkynyp göwnüň,
Guwandyrsa baky berkarar döwrüm,
Uçup, gökde ganat ýaýman bilmersiň.

Gülälek NURBERDIÝEWA.