Eger meni söýýän bolsañ... / gülküli kyssa

EGER MENI SÖÝÝÄN BOLSAÑ...

Ýüregi ýürege, bagry bagra baglap, alty-ýedi ýyl söýşüp, şol gyza öýlenmesem armanda galjagyma ejemi-kakamy ynandyryp, öýlenenime ýaňy iki aý boluberende, futbol boýunça dünýä çempionaty başlandy. Menem, ölemen janköýer bolamsoň, bir oýny hem sypdyrman görjek bolup, her gün işden geldigim telewizoryň öňüne çökýän-de, gijäniň ýaryna çenli galman oturýan. Şeýdip çempionatyň başlananyna üç gün diýlende, gelnim golaýjagyma gelip oturdy-da:
— Her gije telewizoryň öňünde şeýdip oturmak seni irizenokmy? — diýdi. Men oňa jogap berip ýetişmedim, şol wagt janköýerlik edip oturan toparymyň hüjümçisiniň depen pökgüsi garşydaşyň derwezesine girip gitdi. Ýassanyp ýatan ýerimden sesimiň ýetdiginden gygyryp, zöwwe galdym-da, ellerimi kelemenledip diriň-diriň böküp başladym. Bir salym böküp, göwün solpusyndan çykamsoň, gelnime seretsem, ol otagyň bir burçunda ýüzüni ak tam edip, galpyldap dur. Men hiç zat bolmadyk ýaly, ýerime geçip oturamsoň, gözlerimi telewizordan aýyrman:
— Bir zat soradyňmy? — diýdim. Ol saňňyl-saňňyl edip ýanyma geldi-de:
— Zähräm-ä ýardyň – diýdi.
— Bar aýtjagyňam şomy?
— Ýok, uzak gije şol, ýeke topuň ugrunda gan-der bolşup ýörenlere seredip oturmak irizenokmy diýdim.
Şol wagt ýene-de pökgi geçäýmeli boldy-da, ünsüm sowuldy. Men ýene gykylyga tutdurdym.
— Ur, ur-da! Pursady sypdyrma! Aý-ý, seni oýna salyp ýören kim-aý, aýagy duşaklanan ýaly — diýip, oýunça käýinip bolamsoň, «Näme diýdiň?» diýen manyda gelnime göz aýlap goýberdim. Ol uzak gürlese, ýene ýetişmezliginiň mümkindigine göz ýetirendir-dä, gysga gürledi.
— Şeýdip oturmak irizenokmy?
Men onuň özüne sorag berdim:
— Munuň nämesi saňa ýaranok?
— Men muňa düşünemok. Başga zat görenimiz gowy dälmi?
Men ony uzak gürletmän, howuny basmak isledim:
— Sen meni gowy görýäňmi?
— Dagy näme, gowy görmedik bolsam durmuş gurarmydym?!
— Şonyň çyn bolsa, meniň gowy görýän zadymy senem gowy görme- li bolarsyň — diýdim welin, gelnim gözlerini tegeläp, bir salym dymyp oturdy-da, turup gitdi. Men içimden: «Şun-a oňaraýdym öýdýän» diýip be- gendim. Şondan soň futbola tomaşa edenimde, çaý-çörek getiräýmese, asla ýanyma gelmedi. Menem islesem galmagalladym, islesem ýer ýumrukladym, garaz, heziller edip futbola tomaşa etdim.
Gelnimiň bagtynamy ýa-da meniň bagtyma, futbol çempionatynyň tamamlananynyň ertesi güni boks boýunça çempionat başlady. Men eline ellik geýip, ýumruk galgadýanyň barsyna belet bolamsoň, ýekeje tutluşygy sypdyrman tomaşa etdim. Özem tomaşa edenimde olara nähili goranmaly, nädip urmalydygyny öwredip, akyl barynam berdim. Şeýdip, iň gowy görýän boksçymy çempion eden günüm «Formula-1» ýaryşy başlandy. Gepiň gysgasy, telewizoryň öňüne geçenime iki aý çemesi bolan- da, meniň höwes edip tomaşa edýän ýaryşlarym tamamlandy. Gaty gynandym. Gyzyklanyp görýän ýaryşlarym gutaransoň, birhili, hossarsyz galan ýaly bolaýdym.
Bir günem, işden gelsem, gelnim telewizoryň öňünde jaýlaşykly otyr. Öňünde-de çäýnek-käsesi. Telewizo- ra gözüm kaklyşandan, köp bölümli filmiň täzesiniň başlandygyna göz ýetirdim. «Muny bu filmden el çekdirip bolmazmyka» diýen pikir bilen:
— Şunuň ýaly kinolary nädip görüp bilýäň-aý? — diýip soradym. — Näme görmän, gyzykl-a. — Nämesi gyzykly oň? Gelnim bir zat ýadyna düşen ýaly, maňa gülümjiräp seretdi-de:
— Sen meni gowy görýäňmi? — diýdi. Men onuň sowalyna allaniçigsi boldum.
— Soragyň dagy nähili? Başga nähili düşündireýin, gursagymdan ýüregimi çykaryp, eliňe tutduraýmasam.
— Ýok, ýüregiň ýerinde dursun. Ýöne şeýle gowy görýän gelniň eý görýän zadyny ýigrenip bilermiň?
Meniň iki aý ozal özümiň oňa beren sowalyma jogap tapyp bilmän ýuwdundym oturyberdim. Gelnimiň öz edişi ýaly, sowaly menem jogapsyz galdyrdym. Ýöne ertesi güni işden elim täze telewizorly geldim-de, ony beýleki otagda ýerleşdirdim. Şondan bäri bir wagtda sport ýaryşy bilen köp bölümli film görkezilse, men-ä bir otagda, o-da beýleki otagda telewizora tomaşa edýäris. Ine, şeýdip, agzybirje ýaşap ýörüs.

Nurberdi DÄDEBAÝEW.