Ene men garybam garyp

ENE MEN GARYBAM GARYP

Öz öýüm öz watanymda,
Ene men garybam garyp.
Tisginýärin ýatanymda,
Ene men garybam garyp.

Her görenim duşman öýdüp,
Göwnümdäkin bilmen aýdyp,
Gün görüp ýör ogluň şeýdip,
Ene men garybam garyp.

Sessiz urdular taýagy,
Ýykylan tapmaz daýagy,
Başymda ýagyň aýagy,
Ene men garybam garyp.

Dilim çeýnäp agzym ýumup,
Lala döndüm dymyp dymyp,
Bir umytsyz oýa çümüp,
Ene men garybam garyp.

Gara boldy ogluň bagty,
Kör boldy ýörejek wagty,
Bir ýerden düşmezmi ýagty?
Ene men garybam garyp.

Duzak guruldy daşyma,
Awy gatyldy aşyma,
Belalar indi başyma,
Ene men garybam, garyp.

Ýüz urdum Perwerdigäre,
Tapylmady derde çäre,
Sen biçäre men biçäre,
Ene men garybam garyp.

Ene, ene, ah, jan ene,
Ýagdaýlar şeýledir ine,
Duşarmykak bile ýene,
Ene men garybam garyp.

Ýene menden bardyr tamaň,
Peýdasy ýok gyljyň gamaň,
Sapasy ýok bu gün sabaň,
Ene men garybam garyp.

Ine, ýagdaý, ine, günüm,
Düzelmezmi ýene günüm,
Gynandyrdym ene günüň,
Bagyşla garybam garyp

Rahmanguly TUMAÇ.