Gadymy Rimiñ geñ galdyryjy seks wakalary

GADYMY RIMIÑ GEÑ GALDYRYJY SEKS WAKALARY

"Eý, sen, Rim, bet işlerden ýüki ýeten gedem mekan!"
Aleksandr PUŞKIN.

Gadymy Rimde adamlaryñ halaýan bir pişesi bardy: olam ile görünjek bolmak, adyñy adamlaryñ diline düşürmek, haýsydyr bir öñ ilde-günde görülmedik zady edip, seslenme döretmek, wagtlaryny hoş geçirmek üçin täze bolgusyzlyklary oýlap tapmak... Bu bolsa, elbetde, olaryñ jynsy taýdan barha azgynlaşmagyna, has dogrusy, haýwanlaşmagyna alyp barypdyr. Meselem;

1. Imperatrisa Waleriýa bir gijede ýigrimi bäş erkek bilen jynsy gatnaşyga giripdir

Belkäm, siziñ köpiñiz orslaryñ "Jane Air" rok-gruppasynyñ "Messalina" diýen aýdymyny diñläp gören bolmagyñyz mümkin. Emma şol meşhur aýdymda ady tutulýan Messalina barada welin, kän zat bilýänsiñiz öýdemzok.
1937-nji ýylda "Men - Klawdiý" kinofilminde iñlis aktrisasy Merl Oberon tarapyndan oýnalandan bäri, sekiz gezek keşbi janlandyrylan Waleriýa Messalina çeper edebiýatdyr dramaturgiýanyñ hemişe ünsüni çekip geldi. Baryp 1885-nji ýylda italýan ýazyjysy Rafaello Žowanoli "Messalina" atly taryhy romanyny döredipdir. Ondan soñ iñlis ýazyjysy Robert Greýwz "Men - Klawdiý", "Gadyrdan Klawdiý we onuñ aýaly Messalina" (1934, 1935) romanlarynda onuñ çeper keşbini döretmäge synanşypdyr.
Imperator Klawdiniñ üçünji aýaly melike Waleriýa Messalina ölemen nimfomanka bolupdyr. Onuñ her gije birnäçe erkek bilen ýatyp-turandygy, şonuñ üçinem tüýsüni üýtgedip özüni tanatman halkyñ arasynda gezendigi aýdylýar. Üst-başyna idili seretmeýän sölite Waleriýa Messalinanyñ sekse bolan uçursyz höwesi we kanagatlandyryp bolmaýan aýgyrlygy onuñ üçin wagtyny hoş geçirmegiñ bahanasyna öwrülipdir. Bir gün ol Rimiñ iñ aýgyr jelebi Skilla bilen jedele girip, bir gijede ýigrimi bäş erkek bilen ýatyp-turýar. Aýtmaklaryna görä, şonda biraz surnuganam bolsa, Waleriýanyñ doýdumy-doldumy bolmandyr.
Adamsyna garşy dildüwşüge gatnaşandygy üçin öldürilen Messalinanyñ ady köpler üçin jynsy aýgyrlygyñ manysyny beripdir.

2. Kaligula gutlamaga giden toýunyñ gelnini alyp gaýtdy

Eger siz italýan režissýory Tinto Brassyñ 1979-njy surata düşüren adybir kinofilmine tomaşa eden bolsañyz, onda size Kaligulanyñ näderejede azgynlygyny aýdyp oturmagyñ o diýen geregem ýok.
Ondan öñki döwri hasaba almanymyzda-da, Nikol Brazýe, Teofil Marion Dýumersan, Şarl d'Utrepon, Aleksanr Dýuma-atasy ýaly XIX asyryñ fransuz ýazyjylarynyñ we dramaturglarynyñ ýygy-ýygydan ýüzlenýän obrazy bolan Gaý Ýuliý Sezar Kaligulanyñ eden bolgusyzlygy bolsa aklyña-oýuña sygjak zat däl. Rim imperiýasynyñ üçünji hökümdary Kaligulanyñ sözüni ýykmaga adam oglunyñ bogny ysmandyr. Çünki beýtmäge het edenleriñ "başy ölümli, maly talañly" bolupdyr. Munuñ iñ ajy mysallaryndan biri hökmünde senator Gaý Kalpurniý Pizonyñ başyna gelenleri görkezmek bolar. Gaý Pizonyñ toýuna gatnaşan Kaligula onuñ gelnine elini uzadýar. Pizon sypaýyçylyk bilen oña gaýdyp gelnine el uzatmazlygy haýyş edýär. Öñem biriniñ "Eneñi patyşa dula bakdyrsa, arzyñy kime aýtjak?!." diýşi ýaly, edeni bolýan Kaligula muña girre gahary gelýär we zorluk ulanyp Pizonyñ aýalyny toýda oturan ýerinden alyp gaýdýar. Soñra ony özi aýal edip alýar. Biçäre aýaly eşek ýaly ulanyp mazasy gaçandan soñam, oña hiç kimiñ eli ýetmez ýaly çola adalaryñ birine taşlaýar. "Iki at depişer, arasynda eşek öler" diýleni. Haýp, Kaligulanyñ garşysyna gitmegiñ jezasyny iki adamyñ elinde gurjaga öwrülen aýal çekipdir...
Ynha, şular ýaly bihepbe adamyñ obrazy polýak dramaturgy Karol Gubert Rostoworowskiniñ "Gaý Sezar Kaligula" (1917), Alber Kamýunyñ "Kaligula" (1938-1944) ýaly pýesalarynda janlandyrylypdyr.

3. Imperator Neron öz ejesi bilen ýatyp-turdy

Göz öñüne getiriñ: aýdany aýdan, diýeni diýen ýerinde bolýan mes heleý. Özem imperatoryñ ejesi bolsa! "Ýeri, mundan başga merk gerekmi?" diýersiñizem welin, ol mesligine bäs gelip bilmän giden bir imperiýa eýelik edesi gelýän bolsa... Kalbyñda besleýän maksadyña ýetmek üçin mundan artyk nähili hetden aşsa bolarka? Eger ol mes heleý Neronyñ ejesi Agrippina ýaly haramzada biri bolsa-ha, mesele däl! Ogluny ele almak we imperiýada sözüni ýöretmek üçin bar güýjüni ulanan Agrippina Neron bilen jynsy gatnaşyga girmäge çekinip durmandyr. Ýogsa-da, bu bihaýalykdan başgalaryñ habary boldumyka? Elbetde! Bilinmän galjak zat ýok, bu öñem şeýle, häzirem şeýle, şoñam şeýle bolar. Neronyñ eşigine düşen tegmiller onuñ bar aýbyny ile paş etdi... Adam häkimiýet üçin neneñ-niçik edip şeýle biabraýçylygy etmäge bogny ysýarka, nädip gara nebsiniñ pidasyna öwrülýärkä? Hakykatdanam aklyña-oýuña sygjak zatlar däl.

4. Kaligula myhmanlarynyñ aýallary bilen ýatyp-turýardy

Kaligulanyñ bolgusyz nysaklary barmak büküp sanardan köp. Olaryñ biri-de özüni başga erkeklerden rüstem görkezjek bolmak. Ol özüni görkezmegiñ has üýtgeşigräk tärini oýlap tapýar. Kaligula üýşmeleñe çagyrýan myhmanlarynyñ aýallary bilen jynsy gatnaşyga girip, soñra olary öz adamsynyñ ýanyna goýberipdir we ärlerine bolan işi boýdan-başa gürrüñ bermeklerini talap edipdir. Eger gahary gelen äriniñ beren garşylygy ony ýeterlik kanagatlandyrmasa, är-aýalyñ aýrylyşmagyny üpjün edipdir. Bihepde hökümdaryñ şeýtmek bilen maksady - diñe özüniñ başgalara islän zadyny edip bilýändigini görkezmek bolupdyr.

5. Neron ýaş ýigidi biçdirip, ony özüne aýal edip aldy

Eger siz, hem imperator, hemem seksiñ muşdagy bolsañyz, soñam birdenkä içiñiz gyssa, onda siziñ etjek azgynçylyklaryñyzyñ çägi-serhedi bolmaz. Bir tarapdan jan gaýgysyna düşen Neron jynsy gatnaşyklaryñ azgynçykly formalaryna bolan höwesi sebäpli ýaş ýigidi biçdiripdir we onuñ bilen ýaşaşyp başlapdyr. Hatda onuñ bilen romantiki hepdelikleri geçiripdir. Onuñ hopukdyryjy hyýaly güýjüne we azgynlyga bolan höwesine geñ galmazlyk mümkin däl.
Doly ady Neron Klawdiý Sezar Awgust Germanik bolan bihaýa hökümdaryñ ady ahlaksyzlygyñ we erbet häsiýetli hökümdaryñ nusgasy hökmünde ýatlanypdyr. Ol hristianlygyñ ilkinji ýaýran ýyllarynda hristian dinine uýýanlary rehimsiz ýanamalara sezewar edenligi we Isa pygamberiñ yzyny dowam etdiriji hawarylar hasaplanýan Paweldir, Pýotryñ ganyna galandygy üçinem soñky asyrlarda hristian ýazyjylarynyñ üns merkezinde bolupdyr. Baryp-ha, 1603-nji ýylda Matthew Gwinn "Neron" pýesasyny ýazypdyr. Şeýle-de onuñ çeper obrazyny Ernst Ekşteýniñ "Neron", Aleksandr Krawçugyñ "Neron", Iwan Nažiwiniñ "Iudeý", Rik Riordanyñ "Apollonyñ synagy" we başga-da birnäçe eserlerde görmek bolýar.

6. Kaligula öz uýalary bilenem jynsy gatnaşyga giripdi

Kaligulanyñ eden sansyz azgynçylyklarynyñ içinde käte aýtsañ gowumy, ýa aýtmasañ gowy diýdirýänleri bar. Şolar ýaly derejede azgynlaşan hökümdar gyz doganlary bilenem ýatyp-turmakdan gaýtmandyr. Ähli uýasy bilen jynsy gatnaşykda bolup çykandygy aýdylýan Kaligulanyñ iñ halaýan dogany Druzilla eken. Hatda olaryñ kämillik ýaşyna ýetmänkäler-de bile bolanlarynda garry enelerine tutulandygy we soñ-soñlar Kaligulanyñ Druzillany adamsynyñ elinden alandygy aýdylýar. Ýeri, näme diýip, näme aýtjak?! Çöpdüýbüligiñ mundan soñky çägi bolup bilermikä?...

7. Tiberiý jynsy islegini kanagatlandyrmak üçin ýaş ýigitleri saklapdyr

Tiberiý Ýuliý Sezar Awgustyñ durmuşy baradaky maglumatlary eşdeniñde, adamyñ diñe bir akyl-huşy däl, gany-da doñsa gerek. Bulardan biri onuñ ýañy doglan çagalary seks gurjagy kimin oýnanlygydyr, ýöne käbir taryhçylar edil şu maglumatyñ şübhelidigine ünsi çekýärler. Şonuñ üçin biz hem muny diñe şeýle maglumatyñ hem bardygyny aýtmak bilen çäklensek gowy bolar. Ýöne onuñ ýaş oglanlary öz jynsy islegini kanagatlandyrmak üçin ýörite taýýarlandygy welin hak. Aýtmaklaryna görä Tiberiý azgynçylykly jynsy isleglerini kanagatlandyrmak üçin ýaş ýigitleri saklapdyr we olar bilen bile suwda ýüzmäge gidipdir. Tiberiniñ göwnüni awlamak üçin birnäçe sagatlap suwda şapyrdaşyp ýören seks hyzmatçylaryna ol "çaga balyklar" diýýän eken.
Tiberiniñ obrazy çeper edebiýatda-da, kino sungatynda-da birnäçe gezek janlandyrylandygyna garamazdan, ol hemişe ikinji derejeli gahryman hökmünde suratlandyrylyp gelindi. Onuñ iñ gowy tanalýan keşbini ýazyjy Robert Greýwsiñ adybir romany esasynda surata düşürilen "Men - Klawdiý" kinofilminde aktýor Jorj Beýker oýnady.

8. Imperator Geliobagal wagtynyñ köpüsini sekse giderýärdi

Mark Awreliý Antonin Geliobagal (ýa-da Elagabal) gadymy Rimiñ iñ bihepbe imperatorlarynyñ biridir. Köşgüni jelephana öwüren Kaligulanyñ azgynçylykly üýşmeleñlerine işjeñ gatnaşan Geliobagalyñ ygtyýaryna köşk otaglarynyñ biri aýratyn berlipdir. Geliobagal gapynyñ agzynda durup adamlary oña gatnaşmaga yrypdyr.
XIX asyrdan başlap Geliobagal döredijilik dünýäsiniñ ünsüni özüne çekipdir. Antonen Artonyñ romanynda, Žan Lombaryñ "Agoniýa" romanynda onuñ çeper obrazyny janlandyrmaga synanşyk edilipdir. Fransuz režissýory Lui Feýadyñ 1911-nji ýylda surata düşüren "Rim orgiýasy" atly sessiz kinofilminde-de Tiberiniñ obrazyny görmek bolýar.

# Internet maglumatlary esasynda taýýarlandy.

@ Kitapçylar.