Jokonda

JOKONDA

Leonardo da Winçiniñ meşhur eseriniñ
şanyna.

Şaññyrdap töre geç pereñ gözeli,
Seýliñem mübärek, aýagyñ düşsün!
Gelin gelýän ýaly tolgunýar millet,
Her kim ýüzne syljak ýüzüñi açsañ.

Samolýotdan düşürýärler gujaklap,
Gujakdan düşmänem ugraýar ýola.
(Bir söý bilen bagty çüwen dul gelin ~
Zemin ýüzün jümşülledip barýa-la!)

Muzeýiñ törûne gonýar ak guş dek
Uzyn nobatlara berilýär buýruk.
"On sekund...
On sekund, ýatdan çykarmañ,
Pereñi dilbere hemmeler şärik".

Sekundlar başlaýar öz hasabyna:
Bir, iki, üç... Ynha, soñky san.
"Hakyña kaýyl bol, ugra haw indi,
Beýdip durma, diñe sen däl, adam kän"
Az diýýäñmi?

Birinji sekund:
- Müdimilik täjini,
Öz aýañda göterseñ,
Beýikleriñ bagynda
Birje pursat otursañ ~
Eýsem bu azmy?

Ikinji sekund:
- Asyllyga goşulyp,
Çyndan paýyñy alsañ,
Ähli ownuk zatlardan
Bir gez belende galsañ ~
Eýsem bu azmy?

Onunjy sekund:
- Beýnä myh dek urulsa,
Ol mizemez sadalyk.
Içi gat-gat pidullar
Bir dem dursa sabalyp ~
Eýsem bu azmy?..

Yzy görünenok giden hataryñ,
Güwleýär, hyñ berýär bilet kassasy.
Güýzüñ sarymeñiz ýapragna meñzäp,
Otyr mele gelin az-kem gussaly.

On sekund...
On sekund ~ az görmäñ ony,
Alyñ, Asyllykdan paýyñyz alyñ.
Beýikligiñ huzurynda kiçelmäñ,
Beýikligiñ huzurynda beýgeliñ!

Baýram JÜTDIÝEW.