Ogrynyñ ölümi

OGRYNYŇ ÖLÜMI

Il içinde ogry adyn alanyň,
Günleriň bir güni doldy kazasy.
Ugratmaga garry geldi, ýaş geldi,
Maýyp geldi elinde-de hasasy.

Gajaryň sygyry, Patmaň eşegi,
Şalyk ýaşulynyň aýgyr öküzi,
Äşäniň horazy... sanaňda näme,
Eýsem, munda kimiň düzüw dokuzy?

Aýal-ebtat üýşdi bary bir jaýa,
Hemmeleriň başlarynda çabydy.
Jowranmadyk ýok bolsa-da arada,
“Eý, waý!” diýip, göterdiler tabydy.

Göterip barýanyň biri Gajardy,
Biri Şalyk ýaşulynyň ogludy.
Biri Äşäň, biri Patmaň körpesi...
Barybir il bu babatda dogrudy.

17.10.2020.