Ömür

ÖMÜR

1

Hil-hil seniñ gadyr-gymmatyñ ömür:
Kimsä altyn, kimsä kümüş, kimsä-de:
Ýol üstünde ýatan posluja demir.

2

Duşman saýýanlary aradan çyksa,
Diýýär: - Añrym otdur, uzak ýaşamaz.
Kim garşyma gitse, kim göwnüm ýyksa!

3

Jenjel araýarsyñ, aslyşyp dilme,
Ömür tanapymda ýalaw deý gaýçyñ,
Ezraýylyñ aýal görnüşi bolma?!

4

Pilsyrat köprüsi gylyçdan ýiti
Bolsa bolubersin, törpüli baryp,
Küteldip geçmeklik onuñ niýeti.

5

Şükür eýläp, beýle uzak ýaşyña,
Tañra-da minnetdar bolsañ bol welin,
Minnetdar bol, diliñ saklan dişiñe.

6

Bokurdagym bogup bilenok - hatam,
"Ýuwdanyñ däl, siñdireniñ özüñki,
Şuny unutmagyl!" diýerdi atam.

7

Bar öz uçýan belentligi bürgüdiñ,
Bürgüt däldigiñi bilip durkañam,
Belent uçjak bolmaklyk nä görgüdiñ!

8

"Gyzym!" diýýär, ýaşy-halyna görä,
Ýöne uzamasyz ýere uzaýar
Eli welin haram päline görä.

9

Mysalmydyr üç ýüz ýaşy, pyşdylyñ?!
Ýarsyn uklap, ýarsyn gorkup geçirýär,
Arkasynda bus-bus daşy, pyşdylyñ!

10

Sagadyñ "jyk-jyky" dälmikä gülki?!
Ömri ýele sowrup ýörenimize,
"Akmajyklar!" diýip, gülýändir belki!

■ GÖWÜN

Göwün
gaýma ýüpegi deý näzijek,
gaýma ýüpegi deý inçejik göwün.
Usully bolmasañ,
ýa-ha çolaşar,
ýa düşer düwün.

Göwün
köle gonan ýaşylbaş sona,
añsat-añsat özgä ynanmaz, hüşgär.
Usully bolmasañ,
Ürker-de, gaýry
köllerde düşlär.

Göwün
dür monjuk deý säher çyglary,
ot-çöpleriñ näzik boýnuna düzlen.
Usully bolmasañ,
täsin monjuklar
ýok - eýýäm üzlen.

Göwün
meý içilýän nepis meýkäse,
Haýýamyñ rubagy-şygrynda öwlen.
Usully bolmasañ,
goluñdan ýere
gaçandyr - döwlen!

Göwün
ýüpek tary gazma dutaryñ,
baş ýaýkadýan ajap mukamlar çalnar.
Usully bolmasañ,
ahmyrda goýup,
zarñyldap ýolnar.

Göwün
hökmürowan zalym patyşa,
sütem-zorluga höwesdir göwün.
Beýle göwni
elhenç döwüñ jany deý
ýere pylçañ-da döwüñ!

Hemra ŞIROW.n