Arzygül

ARZYGÜL

Şemşatdyň sen aýak sekmez saýaňa.
Arzygülüm, arzymanym, armanym.
Mumyýadyň owaz ýetmez gaýaňa,
Arzygülüm, arzymanym, armanym.

Neçüýn seniň Gün şatlygyň tün boldy?
Neçüýn seniň gül ýaşlygyň kül boldy?
Seni oňa rowa gören kim boldy?
Arzygülüm, arzymanym, armanym.

Kysmatyna kaýyl, göwün bozmaýan,
Daýym-daýym depä çykyp bozlaýan,
“Gola düşüp, ekdi bolgan”¹ boz maral
Arzygülüm, arzymanym, armanym.

Meniň arzuwlarma meňzeş bir guşduň,
Umytlaň yzyndan uzaga uçduň,
Nädip gelip ýerde duzaga düşdüň,
Arzygülüm, arzymanym, armanym.

¹ Mätäjiden

Gurbandurdy ORAZOW.