Bahar

BAHAR

Bu ýyl senden ýüzüm gara,
Bagyşlagyn täze bahar.
Bezenseň-de lälezara,
Görünmeýäň göze bahar!

Sylanmadyň, syndy göwün,
Dogmazdan öň ýaşdy günüň.
Daň goşuňy, çek kerweniň,
Ber ornuňy güýze bahar!

Gorkmazdym men dag-dereden,
Gaýtmazdym men hiç garadan,
Bu gün bakýan penjereden,
Çyka bilmän düze, bahar!

Bolmasam-da çeşmi badam!*
Köp derdi men gören adam,
Ýaka tutup "korunadan"
Çökdüm bugün dyza bahar!

Gowşurardyň nesli-nesle,
Patyşadyň ähli pasla,
Meňzemeýäň ýöne asla,
Öňki ýaly ýaza bahar!

Ter biliňden guçmasam-da,
Al şerabyň içmesem-de,
Kak gapymy açmasam-da,
Dolanmagyn yza bahar!

Amanmuhammet BAZÝAR,
Türkmensähraly türkmen şahyry.

________________________________
* Çeşmi badam - hytaylylara berilýän lakam