Bir täsin ýatlama ýaşaýar mende

. ***

Bir täsin ýatlama ýaşaýar mende,
Gijeden gussaly, ýumşak ýüpek deý.
Ilkinji patany alypdym şonda,
Kakam pahyr bilen Ata Köpekden.

Gözlermiň owasyn örtende perde,
Ýalňyz ýerde, mätäç pilläm kömege,
Sygyndym kyn günde uçrasam derde,
Kakam pahyr bilen Ata Köpege.

Ölüm kemendi deý kişiň minneti,
Boýnumdan inende, boldum köp ökde.
Ýalandan, ýamandan rüstem geldim,
Kakam pahyr ýaly, Ata Köpek dek.

Durmuş ýollaryna bolamda rowan,
Didelem umytly, paýym çepekli,
Sag egnimde duran mähriban kakam,
Sol egnimde duran Ata Köpekdi.

Belki bir gün meniň bagtym çüwer-de,
Şygrym bagty bolup galar köp öýüň.
Umytlary bilen kakam pahyryň,
Yhlaslary bilen Ata Köpegiň.

…Ýatlama ulaşdym, ýok meniň mazam,
Ne asmandan, ne bulutdan kömek bar.
Bu ýer gonamçylyk, çar ýanym mazar,
Bärde kakam bilen Ata Köpek bar.

Gurbandurdy ORAZOW.