Erkek diýip bolarmy?

ERKEK DIÝIP BOLARMY?

Hiç maksatsyz gülýäne,
Mydam şeýdip bilýäne, -
Erkek diýip bolarmy?

Çyn aşyk bolmadyga,
Bir posa almadyga, -
Erkek diýip bolarmy?

Hemmä "gülüm" diýýäne,
Günde birin söýýäne, -
Erkek diýip bolarmy?

Üstünde jan gerene,
Soñra satsa görene, -
Erkek diýip bolarmy?

Saçak başyna geçip,
Bilmese biraz içip, -
Erkek diýip bolarmy?

Märekäñ köp ýerinde,
Içmek bolsa serinde, -
Erkek diýip bolarmy?

Uzak ömri ýolda bolsa,
Öz didaryn gözden salsa, -
Erkek diýip bolarmy?

Kim gahardan dolup-daşyp,
Ile degse hetden aşyp, -
Erkek diýip bolarmy?

Ýürekden söz berene,
Sözün gaýdyp alana, -
Erkek diýip bolarmy?

Resul GAMZATOW.

Rusçadan terjime eden: Baýramjan GURBANMUHAMMEDOW.