Kakama

KAKAMA

Hyýalymda ýaşadym seň ýaşyňy,
Kyrk dokuzdyr elli bilen gürleşdim:
«Atamyň ornuny beriň siz maňa,
Indi ýaş däl,
Menzil-menzil ýol aşdym...»

Kyrk dokuz ýüzüme çiňňerlip bakdy,
Elli ýaş ýüzüni öwürdi menden.
Diýdiler: «Eý, ýigit, atalaň ornun
diläp alyp bolýan däldir Aý, Günden.

Onsoňam, bilip goý ýene bir zady,
Biziň sözlermizi hergiz sal ýada,
Atalaryň orny mydam boş galýar,
Ony aljak gudrat ýokdur dünýäde.

Sen sen bolsaň, meňzemeseň hiç kese
Hem dostlaryň diýse: «Bu tüýs il halar»,
Adamlardyr ýyllar seni küýsese,
Bilgin ýigit, seňem ornuň boş galar.

Ornuň boş galjagyn duýsaň, biläýgin,
Sen öz ataň ýörän ýoluna düşdüň.»
...Hyýalymda ýaşadym seň ýaşyňy,
Kyrk dokuzdyr elli bilen gürleşdim.

Italmaz NURYÝEW.